Primeiru-Ministru, Taur Matan Ruak. Imajen TATOLI/Egas Cristóvão

DILI, 17 marsu 2021 (TATOLI)-Primeiru-Minsitru (PM), Taur Matan Ruak, hateten Governu labele halo milagre hodi kombate surtu COVID-19 iha Timor-Leste, maibé presiza komportamentu di’ak hosi entidade hotu.

“Agora komandante ida de’it mak Primeiru-Ministru, ne’ebé tenke konfia, kuandu komandante mak halai uluk, soldadu sira ida-idak halo ninian. Ita hotu tenke kalma no foku ba komportamentu atu prevene moras ne’e. Ita bele ko’alia to’o ne’ebé de’it, maibé iha buat rua de’it, komportamentu no hein vasina, tanba ita labele halo milagre, kuandu vasina seidauk iha tenke hatudu komportamentu hanesan taka ibun ho máskara, fase liman, labele halibur malu, kuandu moras ona informa lalais, liu ida ne’e laiha ona,” PM Taur dehan hafoin enkontru ho Prezidente Repúblika, Francisco Guterres ‘Lú Olo’, iha Palásiu Prezidensiál, kuarta ne’e.

Lia hirak ne’e hodi hatan ba deklarasaun eis Primeiru-Ministru, Marí Alkatiri, ba Agência Lusa, ne’ebé lamenta ho silénsiu Xefe Governu no Xefe Estadu, relasiona ho evolusaun kazu pozitivu COVID-19 iha loron hirak ne’e aumenta ba bebeik.

Maski nune’e, PM Taur konsidera situasaun agora bele kontrola, tanba seidauk tama iha situasaun piór.

“Maski situasaun bele kontrola, husu ba públiku kalma, labele pániku, tanba piór liu maka kuandu pániku. Tanba ema balun hateten katak Primeiru-Ministru no Prezidente Repúblika la ko’alia buat ida, maibé atu hateten katak ami na’in-rua ne’e mai hosi funu, ne’ebé situasaun hanesan ne’e ami la hakfodak ida,”Eis Xefe Estadu ne’e subliña.

Jornalista: Antónia Gusmão

Editora: Julia Chatarina

 

HAKEREK NO HATÁN

Please enter your comment!
Please enter your name here