Ministru Administrasaun Estatál (MAE), Miguel Pereira de Carvalho. Imajen/TATOLI

DILI, 17 marsu 2021 (TATOLI)—Governu liuhosi Ministériu Administrasaun Estatál (MAE) fó sai sirkulár konfinamentu parsiál ba autoridade munisipál atu halo sensibilizasaun ba komunidade iha ida-idak nia territóriu hodi husu populasaun atu labele kontra regra afiksasaun rezidénsia.

Ministru Administrasaun Estatál, Miguel Pereira de Carvalho, hateten sirkulasaun ne’e sirkula bazea ba Dekretu Prezidente Repúblika Nú. 15/2021, 01 Marsu, renovasaun Estadu Emerjénsia (EE) ba dala-11 junto Resolução do Governo Nú. 12/2021, 08 Marsu impoin serka sanitária Munisípiu Dili no mós ho evolusaun kazu positivu COVID-19 to’o 11 marsu 2021.

“Probabilidade medida Governu nian atu evita populasaun labele toma medida mesak sein kuñesementu hosi autoridade kompetente sira (Seguransa, Ministério Saúde no CIJK), mak liuhusi sirkulár ida-ne’e husu ba Prezidente Autoridade sira no Administradór Munisípiu sira para orienta Administradór Postu no xefe suku sira hodi halo sensibilizasaun ba komunidade iha ida-idak nia territóriu atu populasaun labele kontra regra afiksasaun rezidénsia (muda hela fatin) perante Timor-Leste sei iha faze Estadu Emerjensia,” Miguel Pereira de Carvalho hateten iha karta sirkulár konfinamentu nian ne’ebé Agência TATOLI asesu liuhosi Prezidente Autoridade Munisípiu Baucau, kuarta ne’e.

Karta sirkulár ne’e haktuir pontu atensaun sira hanesan tuir mai ne’e; Ho aplikasaun regra Estadu Emerjénsia ne’ebé Governu aplika hodi husu ba populasaun atu labele kontra regra afiksasaun rezidénsia (muda hela fatin) perante Timor-Leste sei iha faze Estadu Emerjensia.

Halo sensibilizasaun ba populasaun sira kada postu, suku, aldeia no bairru ida-idak, atu labale taka dalan entre postu, suku, aldeia, bairru nian iha dalan públiku bainhira la hetan autorizasaun hosi autoridade kompetente (Seguransa, Ministériu Saúde no CIJK). Presiza koordena ho autoridade seguransa hanesan PNTL hodi normaliza dalan sira-ne’ebé taka bainhira akontese bandu.

Serka sanitária no konfinamentu obrigatóriu parsiál entre postu, suku, aldeia no bairru só bele halo de’it hosi autoridade kompetente no husu ba populasaun sira hotu-hotu atu labele pániku bainhira la tama kategória kontaktu besik ho ema pozitivu.

Populasaun hot-hotu tenke kumpre regra prevensaun pesoál hanesan mantein distánsia pelumenus metru ida (1) entre ema ida ho ema seluk, tenke uza máskara, bandu atu halo sorumutu ka manifestasaun, no atividade kulturál ka desportu. Populasaun hotu-hotu tenke fase liman ho sabaun no uza hand sanitaizer.

Husu ba Autoridade Lokál (Administradór Postu sira, xefe suku no xefe aldeia sira atu transmite informasaun ne’ebé loloos, kredível, no husi fontes loloos, tenke koordena ho autoridade kompetente ne’ebé besik.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here