Ekipa Servisu Covalima Vitória ho Domin-20 (EKSES-Covalima), hahú fahe ona apoiu umanitária ba estudante Covalima-oan ne’ebé hela iha kost (aluga uma) iha Dili. Imajen/Espesiál.

DILI, 17 marsu 2021 (TATOLI)—Koordenadór Ekipa Servisu Covalima Vitória ho Domin-20 (EKSES-Covalima), Mario Tilman, hateten hahú ohin EKSES ne’ebé destaka iha Munisípiu Dili, hahú fahe ona apoiu umanitária ba estudante Covalima-oan ne’ebé hela iha kost (aluga uma) no hala’o sira-nia estudu iha Dili.

Notísia Relevante: Estudante Covalima iha Dili husu apoiu nesesidade bázika ba Governu

Nia hatutan, apoiu umanitária ne’ebé EKSES-COVID20 halo ho objetivu atu ajuda estudante sira, oinsá bele aguenta moris iha situasaun serka sanitaria ne’e nia laran.

Koordenadór Ekipa Servisu Covalima Vitória ho Domin-20 (EKSES-Covalima), Mario Tilman. Imajen/Espesiál.

“Apoiu umanitária ne’ebé ita halo hahú iha sesta foin lalais ne’e ho maneira emerjénsia de’it, maibé haree ba estudante sira-ne’e mai nafatin dehan hahan laiha entaun ita hahú fahe daudaun ona apoiu umanitária ba estudante Covalima-oan sira oinsá sira bele aguenta moris iha situasaun serka sanitaria ne’e,” Mario Tilman hateten ba Agência TATOLI liuhosi telefónika, kuarta ne’e.

Nia hatutan, maneira fó apoiu umanitária ba estudante sira ne’e ho modelu hanesan cesta bázika no fahe tuir lista ne’ebé mak estudante sira ba hlo rejistu ne’e, no fahe la haree ba estudante ne’ebé hela iha uma aluga maibé temi Covalima-oan ne’e hetan hotu.

“Apoiu umanitária ne’ebé ita fó ba estudante sira-ne’e hanesan, foos ema ida hetan kilo lima, mina tau áqua mamuk $0,25 nian ida, no Supermie Sedaap falun tolu kada ema ida,” nia dehan.

Apoiu umanitária ne’ebé EKESES halo ne’e, nia dehan, bazea ba estoke ne’ebé mak iha entaun ajuda de’it estudante sira oinsá atu aguenta moris de’it maibé atu apoiu foos no sira seluk ne’e só Governu mak bele apoiu.

“Apoiu ne’ebé ami halo la’ós ami mak na’in ba sasán maibé depende ba apoiu ne’ebé tama mai, entaun ami maneja fó apoiu umanitáriu de’it ba estudante sira oinsá sira aguenta de’it maibé atu apoiu loloos foos no seluk tan ne’e, Governu mak bele ajuda,” nia haktuir.

Nia informa, totál estudante Covalima-oan ne’ebé hala’o sira-nia estudu iha Dili, ba halo rejistu iha sede RENETIL hamutuk ema na’in-3.612.

“Hosi númeru estudante hamutuk 3.612 ne’e, dadus provizóriu ne’ebé estudante sira simu ona apoiu umanitária ne’e hamutuk ema na’in 120. Tanba ne’e, ami husu Governu bele ajuda ami tau matan ba estudante Covalima-oan ne’ebé hala’o sira-nia estudu iha Dili, tanba iha situasaun lockdown susar ba sira atu hetan hahan,” Mario Tilman hateten.

Jornalista: Arminda Fonseca

Editór: Cancio Ximenes 

HAKEREK NO HATÁN

Please enter your comment!
Please enter your name here