Prezidente Komisaun G ne’ebé trata asuntu Edukasaun, Juventude, Kultura no Sidadania, Deputadu António Verdiál de Sousa. Imajen/Tatoli.

DILI, 17 marsu 2021 (TATOLI)—Prezidente Komisaun G ne’ebé trata asuntu Edukasaun, Juventude, Kultura no Sidadania, Deputadu António Verdiál de Sousa, propoin atu deputadu hotu-hotu tenke halo fiskalizasaun ba implementasaun vijénsia serka sanitária no konfinamentu obrigatóriu.

Prezidente Komisaun G ne’e kestiona serka sanitaria no konfinamentu domisiliáriu iha Dili laran tanba movimentu ba de’it ema-nia uma mós labele.

Tanba ne’e, nia husu ba Parlamentu Nasionál, di’akliu uma fukun labele tuur nonook hanesan ne’e, tenke uza podér lejizlativu no podér halo fiskalizasaun.

Nia dehan, não me digas deputadu sira labele fiskaliza ba aktu no atetude membru polísia sira-ne’ebé halo servisu iha terrenu baku ema arbiru de’it ne’e, trava ema arbiru de’it no membru parlamentu plat mean mós sira kestiona.

Nia argumenta, parlamentu mak hahoris tiha Governu no fó opurtunidade tomak ba Governu maibé atuasaun ne’ebé membru polísia halo iha terrenu ne’e ladún efikáz no ladún saudável.

“Tanba ne’e ha’u deputadu ne’ebé mai hosi instrumentu polítiku KHUNTO, ha’u la konkorda atu limita membru deputadu nia servisu iha terrenu. Lalika ta’uk ida, se Maromak deside ita atu mate tanba COVID-19 ne’e, mate. Ha’u la ta’uk. Povu haruka ita reprezenta sira, ita labele tuur nonook de’it. Ha’u hanesan deputadu hosi KHUNTO la konkorda atu limita deputadu sira halo fiskalizasaun iha territóriu tomak,” Deputadu Verdiál levanta asuntu ne’e bainhira hala’o reuniaun ho Prezidente Parlamentu Nasionál, iha plenária, Parlamentu Nasionál, kuarta ne’e.

Nia parte komprende maibé Governu mós tenke komprende tanba deputadu nu’udar reprezentante povu no labele tuur hela de’it.

Purtantu Prezidente Komisaun F ne’ebé trata asuntu Saúde, Seguransa Sosiál no Igualdade Jéneru, Deputadu Noé da Silva Ximenes ‘Buka-Tuir’, seidauk hatene didi’ak regra sanitária no konfinamentu ne’e tanba ne’e mak atividade fiskalizasaun komisaun nian pendente hela.

“Ami iha ajenda lubuk ida atu halo fiskalizasaun ba munisípiu sira maibé iha regra sanitária ne’e ami seidauk hatene, regra ne’e vinkula mós deputadu sira ka lae. Tuir loloos ami tenke halo sirkulasaun hodi halo fiskalizasaun, maibé ami atu sai mós ami ta’uk. Keta halo polísia sira empata tiha ami-nia sirkulasaun,” nia akresenta.

Hatán ba kestaun ne’e, Prezidente Parlamentu Nasionál (PPN), Deputadu Aniceto Longuinhos Guterres Lopes, sei koordena ho Governu kona-ba reprezentante povu sira sei halo fiskalizasaun iha vijénsia serka sanitaria no konfinamentu obrigatóriu.

Maske nune’e, nia dehan, oras  ne’e situasaun COVID-19 sei inserteza hela tanba ne’e vizita fiskalizasaun ba munisípiu sira sei bazeia estadu nia nesesidade.

“Tanba serka sanitária ne’e ita foin hahú iha Covalima, Bobonaro, Dili, Baucau no Viqueque. Ita bele barani mate, ema seluk lakohi mate, ema ta’uk ita (deputadu sira) lori fali virus ba, ha’u-nia reseiu mak ida-ne’e,” nia informa.

Jornalista: Evaristo Soares Martins

Editór: Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here