Administradór Postu Administrativu Iliomar Munisípiu Lautém, João Baptista Ruak. Imajen/Espesiál.

DILI, 17 marsu 2021 (TATOLI)—Administradór Postu Administrativu Iliomar Munisípiu Lautém, João Baptista Ruas, husu ba abitante sira iha Iliomar atu labele halo viajen ba Uatucarbau no Baguia tanba kazu pozitivu COVID-19 ne’e akontese ona iha Munisípiu Viqueque no Baucau.  

“Ohin, ha’u sei halo diálogu ho lidér komunitáriu sira hosi suku neen, Postu Administrativu Iliomar nian, oinsá aban ba leten atu halo sensibilizasaun prevene COVID-19 nian ba komunidade hotu, liuliu sira-ne’ebé hela besik iha baliza Postu Administrativu Uatucarbau-Viqueque no Postu Administrativu Baguia-Baucau nian, tuur hakamatek labele halo viajen ba-mai. Tanba, daudaun ne’e Munisípiu Viqueque no Baucau iha ona kazu pozitivu ba COVID-19,” João Baptista Ruas hateten ba Agência TATOLI liuhosi telefónika, kuarta ne’e.

Nia dehan, Postu Administrativu presiza halo sensibilizasaun ba nia abiatante sira tanba komunidade barak liu halo toos no natar iha área ne’ebé baliza kedas ba Postu Administrativu Baguia no Uatucarbau.

“Entaun, ami-nia planu ami sei harii ekipa task force ida iha Postu Irabere ne’ebé baliza kedas ho Uatucarabau-Viqueque nian no mós iha Larimi baliza ho Baguia-Baucau nian. Baliza rua ne’e mak importante tebes tau postu seguransa tanba fasil ema bele halo viajen ilegál ba-mai,” nia dehan.

Tanba ne’e, nia apela ba lider komunitáriu sira ida-idak tenke fó atensaun makaas ba ninia komunidade ne’ebé hela besik baliza, haree ema foun ruma tama tenke fó hatene ba parte seguransa no saúde nian, nune’e bele halo teste swab ba sira.

“Ita presiza fó atensaun ba ita-nia komunidade tanba moras ne’e mai la fihir ema ida. Ne’ebé dalan di’ak mak ita prevene antes duke kura,” nia hateten.

Postu Administrativu Iliomar iha Suku neen hanesan, Iliomar I, Iliomar II, Aelebere, Fuat, Caenlio, no Tirilolo, ho ninia Aldeia hamutuk 25, totál populasaun 1253 (tuir sensu 2015).

Jornalista: Arminda Fonseca

Editór: Cancio Ximenes.

HAKEREK NO HATÁN

Please enter your comment!
Please enter your name here