Negosiante modo-tahan iha Merkadu Manleuana, Mariana Marcal. Imajen TATOLI/Arminda Fonseca.

DILI, 16 marsu 2021 (TATOLI)—Negosiante modo-tahan iha Merkadu Manleuana, Mariana Marcal, hateten sente kontente tebes faan modo-tahan iha situasaun serka sanitária tanba modo-tahan ne’ebé nia faan folin loos no hetan rendimentu di’ak.

“Ba ha’u pesoál sente kontenti tebes iha situasaun serka sanitaria ne’e, tanba modo-tahan ne’ebé ha’u faan ne’e folin loos tanba loron ida ha’u faan ne’e bele hotu kedas. Entaun, ha’u bele hetan rendimentu ne’ebé di’ak,” Negosiante Mariana Marcal hateten ba Agência TATOLI iha Merkadu Manleuana, tersa ne’e.

Nia dehan, antes Estadu aplika serka sanitaria ne’e, modo-tahan ne’ebé nia faan ne’e ladún folin tanba negosiante barak mak faan no faan hadau malu tan ho negosiante sira-ne’ebé faan modo-tahan ho karreta sira-ne’e.

“Antes seidauk aplika serka sanitaria, ha’u faan modo la folin tanba hadau malu ho negosiante lori karreta faan modo hosi munisípiu mak mai. Tanba sira faan ba ami ho kompradór sira folin hanesan de’it entaun ema hola sira-nia modo duké ami faan ne’e. Maibé, agora aplika serka sanitária sira la mai, ha’u mesak mak faan entaun modo-tahan folin loos,” nia hateten.

Nia dehan, iha situasaun serka sanitária rendimentu ne’ebé tama depende ba ninia badinas ba sosa modo iha agrikltór sira-ne’ebé faan modo iha sira-nia kantadeiru.

“Agora ne’e osan tama depende ba ha’u-nia badinas. Se loron ohin, ha’u hasai $60 ba kantadeiru sosa modo mai, ha’u faan fali ohin loron, osan inan bele fila kedas no ami bele hetan osan-funan $10 ba leten,” nia haktuir.

Durante serka sanitária modo ne’ebé nia faan ne’e nia ba hola iha Kunsin Kasnafar-Mota Ulun Comoro nian, maibé nia nafatin kumpre regra prevensaun hosi organizasaun mundiál Saúde (OMS) ne’ebé fó sai iha Ministériu Saúde (MS) katak uza máskara, distánsia sosiál no fase liman ho sabaun.

“Modo ne’ebé ha’’u faan ne’e ba sosa iha mota ulun Comoro nian. Maibé, nu’udar sidadaun di’ak, ha’u tuir nafatin regra hosi saúde katak tenke uza máskara no distánsia sosiál. Entaun, bainhira ha’u sosa, modo-na’in iha mota sorin lori tau iha dalan klaran mak ha’u foti no tau fali osan mak sira-na’in mai foti osan. Ami la halo kontaktu fíziku tanba seguransa akompaña ami,” nia dehan.

Tuir observasaun ne’ebé Agência TATOLI halo, ohin, iha Merkadu Manleuna nota katak situasaun la’o di’ak tanba negosiante sira-ne’ebé faan modo aplika duni regra hosi Ministériu Saúde nian hodi mantein halo distánsia fíziku maibé negosiante sira seluk ne’ebé faan obralan seidauk kumpre regra tanba sira la kumpre regra distánsia sosiál.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here