Prezidente Autoridade RAEOA-ZEESM,TL, Arsénio Paixão Bano. Imajen/ZEESM,TL

DILI, 16 marsu 2021 (TATOLI)–Ministériu Saúde (MS) liuhosi Servisu Komisaun Rejionál Prevensaun no Mitigasaun Surtu COVID-19, fó sai ona rezultadu teste swab ba Prezidente Autoridade Rejiaun Espesiál Oé-cusse Ambeno (RAEOA) no Zona Ekonomia Espesiál Sosiál Merkadu, Timor-Leste (ZEESM, TL), ho funsionáriu sira hamutuk 126 ho rezultadu negativu.

“Ha’u-nia teste swab hamutuk ho funsionáriu, ninia rezultadu fó sai iha semana kotuk ona katak negativu hotu,” Prezidente RAEOA-ZEESM, Arsénio Paixão Bano, informa ba Agência TATOLI via telefónika, tersa ne’e.

Notísia relevante: MS halo teste swab ba PA RAEOA-ZEESM no funsionáriu 126

Teste ne’e realiza iha loron 09 to’o 10 marsu, liuhosi kooperasaun Servisu Komisaun Rejionál Prevensaun no Mitigasaun Surtu COVID-19 RAEOA, Pilar 5 ho pilar 3 hamutuk Gabinete halo.

Iha segunda (08/03), funsionáriu tékniku RAEOA na’in-haat ne’ebé halo formasaun iha Ministériu Finansa (MF) ramata no fila ona hosi Dili bá Oé-cusse, inklui funsionáriu haat hosi MF ne’ebé daudaun ne’e tulun hela tékniku sira iha Sekretária Rejionál Finansa.

Teste hirak ne’e realiza tanba MF tama cluster ida entre 19, ne’ebé iha cluster ne’e iha na’in-tolu maka infetadu COVID-19.

Nune’e, Prezidente Autoridade husu ba funsionáriu sira kontinua kumpre regra Estadu Emerjénsia, inklui regra ne’ebé estabelese hosi MS no Organizasau Mundiál Saúde (OMS), hanesan kontinua uza maskára, fase liman bebeik no distansiámentu sosiál metru ida entre ema ida ho seluk iha fatin públiku hodi prevene surtu COVID-19.

“Ha’u husu nafatin ba funsionáriu sira atu mantein kumpre regra Estadu Emerjénsia hodi prevene-an hosi COVID-19,” Prezidente Autoridade apela.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here