Rezultadu fotografia ekipa REKREATIF iha momentu tuir espozisaun iha Indonézia. Imajen/Espesiál.

DILI, 16 marsu 2021 (TATOLI)—Koordenadór Rede Kreatividade Fotógrafu (REKREATIF), Acacio Pinto, informa fotógrafu timoroan no membru REKREATIF na’in-neen (6) sei reprezenta Timor-Leste hodi partisipa espozisaun fotografia internasional iha Thailándia.

Notísia Relevante: REKREATIF Reprezenta TL Tuir Feira Fotografia Internasionál Iha Indonézia

Acacio Pinto hateten, iha eventu internasional ne’e realiza tanba ekipa REKREATIF hetan konvite hosi Universidade Silpakorn (Fakultas Seni Lukis, Seni Pahat dan Grafis) servisu hamutuk ho The Royal Photographic Society of Thailand realiza espozisaun ba fotógrafu foinsa’e Timor-Leste nian ne’ebé sei realiza iha 01-24 abril 2021.

“Espozisaun ne’e hetan apoiu hosi The Japan Foundation Asia Center ne’ebé atu halo promosan kona-ba kultura entre Japaun, Thailándia no Timor-Leste. Loloos ne’e, ekipa REKREATIF ba diretamente tuir espozisaun fotografia iha Thal’andia, maibé tanba Timor-Leste (TL) enfrenta mós ho situasaun COVID-19 no serka sanitária entaun deside liuhosi online de’it. Antes ne’e, ami iha ligasaun ka kuñese malu ho kolega sira arte no kultura iha Japaun, Bangkok nian liuhosi arte fotografia,” Acacio Pinto hateten ba Agência TATOLI liuhosi telefónika, tersa ne’e. 

Nia hateten, fotografia sira ne’ebé sei aprezenta iha espozisaun ne’e mak fotógrafu timoroan na’in-neen ne’e foti tema jerál de’it, tanba komisaun organizadora deside koko aprende hasai fotografia kona-ba ba buat hotu-hotu ne’ebé akontese iha fotógrafu ida-idak nia hela fatin no iha Sidade Dili nia laran.

“Ami foti fotografia jerál de’it. Maibé, sira husu mai ami katak ami tenke aproveita ho situasaun lockdown ne’ebé mak iha, ami bele hasai fotografia ba ida-idak nia-fatin. Saida mak ami halo no saida mak ema bele halo iha liur, no ninia rezultadu sira-ne’e komisaun organizadora iha Thailándia no Japaun mak deside, fotografia hira mak merese atu aprezenta iha espozisaun ne’e,” nia dehan.

Hanesan jornalista no fotógrafu ida, nia dehan, nia tenta oinsá halo movimentu iha Sidade Dili nia laran atu bele kaptura imajen saida de’it mak iha, kolega sira seluk hasai de’it fotografia iha uma saida mak sira halo, no kolega sira balun mak prepara fotografia sira-ne’ebé iha ligasaun ba fotografia antigu sira.

Rezultadu fotografia ekipa REKREATIF iha momentu tuir espozisaun iha Indonézia. Imajen/Espesiál.

Sira hili tema jerál de’it, nia dehan, tanba sira tuir espozisaun ne’e hanesan aprendizajen ida tanba sira atu aprezenta matéria ne’ebé sira aprende antes ne’e hanesan tekniku travel photography, landscape photography, culture, documentary, still photography, food photography and human interes photography journalism.

“Entaun, tinan ne’e, ami husu ba sira atu halo espozisaun ba matéria ne’ebé ami hetan ona ninia rezultadu. Ami agora prátika hasai fotografia, entaun ami hasai fotografia kona-ba situsaun COVID-19, kultura no seluk tan, atu hatudu ninia rezultadu mak liuhosi espozisaun iha Thalandia ne’e,” nia dehan.

Nia haktuir, daudaun ne’e fasilitadór sira lor-loron tenke haree rezultadu fotografia sira-ne’ebé mak sira hasai tiha ona iha Dili, relasiona ho situasaun atuál kona-ba serka sanitaria iha Dili, to’o tempu espozisaun mak deside atu hatun ka aprezenta retratu ida-ne’ebé sira hili.

Espozisaun ne’ebé hala’o iha Thailándia, nia dehan, ne’e komisaun Japaun mak fó apoiu ba REKREATIF, entaun buat ne’ebé timoroan atu aprende iha espozisaun ne’e mak oinsá aprende kona-ba valór fotografia ida-nian. 

“Tanba iha Timor-Leste dala barak, ema hanoin fotógrafu ne’e baibain ida, sé de’it bele hasai fotografia. Maibé, bainhira ami heree no estuda katak fotografia ne’e mós hola parte ba dezenvolvimentu nasaun nian, liuliu liga ba Timor-Leste ninia dezenvolvimentu. Ita presiza mós atu fó sai kona-ba paisajen, kultura no turizmu Timor nian ba iha Ázia,” nia haktuir.

Hosi espozisaun ne’e, nia esplika, REKREATIF lahetan osan tanba ho prinsípiu ne’ebé mak la’ós hanoin uluk osan maibé oinsá promove Timor-Leste ba iha mundu. Tanba, buat ne’ebé motiva sira-ne’e mak iha tempu koloniál no okupasaun Indonézia nian, haree katak dokumentasaun sira barak mak fotógrafu no jornalista sira hosi rai-li’ur mak halo.

“Bainhira iha tempu ukun-aan, ida-ne’e fanu fali ita. Katak, timoroan mak tenke na’in ba akontesimentu sira-ne’e, tanba akontesimentu sira-ne’e sai istória ba Timor-Leste. Entaun, iha espozisaun ne’e, ami la’ós hanoin faan foto maibé hakarak halo promosaun ba Timor-Leste liuhosi fotografia. Tanba ne’e, ami la hetan osan hosi espozisaun ne’e,” nia dehan.

Tuir planu, espozisaun fotografia ne’e sei realiza iha Galeri Seni PSG Fakultas Seni Lukis, Seni Pahat dan Grafis, Universitas Silpakorn, Bangkok, hahú hosi loron 01 -24 abril 2021, loke ba públiku iha tuku 10:00-18:00, no sábadu-domingu inklui loron feriadu ne’e taka.

Fotógrafu hosi ekipa REKREATIF ne’ebé reprezenta Timor-Leste partisipa iha espozisaun fotografia internasionál ne’e mak hanesan Basilio Gomes da Silva, Silvestre Rudiyanto Soares, Silvestre Pires Castro, Rofino Leandro Fereira, Acacio Pinto no Hipolito da Silva.

Espozisaun fotografia ne’e sei hala’o iha Thailándia no nasaun sira-ne’ebé sei partisipa mak hanesan Thailándia, Japaun no Timor-Leste.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here