Simulasaun evakua pasiente pozitivu COVID-19 iha RAEOA. Imajen/ZEESM,TL

DILI, 16 marsu 2021 (TATOLI)—Autoridade Rejiaun Administrativa Espesiál Oé-cusse Ambeno (RAEOA) no Zona Ekonomia Espesiál Sosiál Merkadu, Timor-Leste (ZEESM,TL) lansa utilizasaun mákina teste swab nose no simulasaun evakua pasiente COVID-19.

Tuir Prezidente RAEOA-ZEESM,TL, Arsénio Paixão Bano, atividade ne’e atu prepara bainhira iha kazu pozitivu iha kuarentena ka auto-kuarentena, bele evakua pasiente ba sala izolamentu, ne’ebé hala’o hosi pilar tolu no haat, ho koordenasaun Servisu Komisaun Rejionál Prevensaun no Mitigasaun Surtu COVID-19 RAEOA.

Prezidente Autoridade RAEOA-ZEESM,TL, Arsénio Paixão Bano. Imajen/ZEESM,TL

“Ha’u husu Servisu Komisaun Rejionál RAEOA atu bem preparado hodi asume papél ne’ebé  importante tebes atu kombate kazu COVID-19 iha rejiaun ne’e,” Prezidente Autoridade dehan, liuhosi nota ne’ebé Agência TATOLI asesu, tersa ne’e.

Nia husu entidade hotu atu serbisu maka’as liután asegura populasaun RAEOA hamutuk  85.000 hosi vírus.

Biban hanesan, Sekretáriu Rejionál Saúde, Manuel da Costa, hateten, mákina swab nose oferese hosi Korea International Corporation Agency (KOICA).

Simulasaun evakua pasiente pozitivu COVID-19 iha RAEOA. Imajen/ZEESM,TL

“Espera ekipamentu ne’ebé iha, bele ajuda ita-nia sidadaun sira ne’ebé hetan moras COVID-19 iha RAEOA,” nia dehan.

Nia esplika, funsionamentu mákina teste swab nose, ninia durasaun durante minutu lima ou 10, ne’ebé presiza prenxe dadus pesoál, hodi halo teste hafoin dizinfekta, atu nune’e pasiente tuir mai labele kona vírus.

Autoridade RAEOA-ZEESM,TL lansa utilizasaun teste swab nose. Imajen/ZEESM,TL

Nune’e, amostra swab nose lori ba laboratóriu hodi prosesa ho durasaun oras ida, konforme ema hira mak hasai teste no bele hatene kedas rezultadu.

Programa ne’e koordena ho Servisu Komisaun Rejionál Prevensaun no Mitigasaun Surtu COVID-19 iha RAEOA pilar lima no tolu, atu prepara di’ak serbisu responde dezafiu no ameasa hosi kazu COVID-19 iha RAEOA ne’ebé sei hasoru iha futuru.

Lansamentu ne’e, partisipa hosi Membru Autoridade RAEOA-ZEESM,TL, Komandate Polísia Oé-Cusse, Mateus Mendes, Unidade Patrullamentu Fronteira (UPF), FALINTIL-Forsa Defeza Timor-Leste (F-FDTL) inklui ekipa hosi pilar ida to’o sia RAEOA.

 Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here