Diretor Operasaun AIFAESA. Imajen TATOLI/Antónia Gusmão

DILI, 16 marsu 2021 (TATOLI)—Autoridade Inspesaun Fiskalizasun Atividade Ekonomia Sanitária no Alimentar (AIFAESA) halo inspesaun ba estabelesimentu komersiál lima iha Dili, iha loron hirak liubá no deteta folin foos normál.

“Ami halo inspesaun iha estabelesimentu área Becora, Taibesi, Comoro, Hudi laran, no Audian, bazeia ba informasaun hosi komunidade no konsumidór sira no ami detekta folin foos normál hela,” Diretór Operasaun AIFAESA, Gabriel da Costa, informa ba Agência TATOLI via telefónika, tersa ne’e.

Nia dehan, hosi estabesimentu hirak ne’e, operadór ekonómiku sira fa’an foos kilograma 25 ho folin $12,50 no kilograma 30 ho folin $14 to’o $15,50.

“Ami halo konfirmasaun ba estabesimentu sira ne’e no sira hateten sira sosa tutan hosi kompañia distributór foos kilograma 25 ho folin $11,50 no fa’an tutan ho folin $12,50 to’o 13,50, enkuantu kilograma 30, sosa hosi kompañia distributór $13,50 sira fa’an fali $14 to’o $15,50, tanba ne’e konsidera normál hela,” nia akresenta.

Iha biban ne’e, AIFAESA kontinua husu ba públiku atu  informa karik iha estabelesimentu ka operadór ekonómiku sira tenta hasa’e folin, komunidade sira iha direitu informa ba autoridade atu halo intervesaun.

Dekretu lei numeru 29/2011 kona ba presu justu, haktuir katak operadór ekonómiku ne’ebá hasa’e folin produtu tantu materiál no nesesidade bazika liu 10%, maka konsidera hanesan krime no tenke prosesu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here