Administradór Munisípiu Viqueque Januario Soares “Boly”. Imajen/Espesiál.

DILI, 16 marsu 2021 (TATOLI)—Administradór Munisípiu Viqueque, Januário Soares “Boly”, apela ba komunidade Viqueque atu mantein prevensaun no hakmatek iha ida-idak nia uma no labele halo movimentu ba-mai.

“Ha’u apela ba komunidade Viqueque katak ida-idak mantein prevensaun no hakmatek iha ida-idak nia uma hodi labele halo vizita ba malu inklui labele dezloka ba fatin seluk. Atu nune’e, pesoál saúde bele halo vijilansia hodi buka tuir família afetadu COVID-19 hodi halo teste swab, nune’e moras ne’e labele da’et ba ema seluk,” Januário Soares “Boly” hateten ba Agência TATOLI liuhosi telefónika, tersa ne’e.

Tanba, nia hateten, ema-ne’ebé afetadu ne’e la’ós iha Viqueque mak kona maibé hosi nasionál mak lori mai. Tanba ne’e, nia apela, husik tempu ba parte saúde atu hala’o nia knaar no komunidade presiza kontribui medida prevensaun hosi Ministériu Saúde (MS) no Organizasaun Mundiál Saúde (OMS) nian.

Ho kazu foun ne’e, nia informa, Governu liuhosi Konsellu Ministru dekreta ona serka sanitária hahú horikalan 00:00, loron 15 to’o 29 marsu, ba populasaun Munisípiu Viqueque sei lahalo movimentu inklui transporte públiku hodi evita transmisaun COVID-19.

Maibé, nia dehan, iha dirasaun balun ne’ebé presiza halo servisu liga ho pandemia COVID-19 nian mak sei halo movimentu maibé nafatin kumpre regra hosi MS no OMS katak fase liman ho sabaun, uza máskara, no distánsia sosiál no fíziku.

Tuir nia, antes atu implementa serka sanitária iha Munisípiu Viqueque ne’e, parte hotu-hotu iha administrasaun Viqueque nian sei kria komisaun prevensaun Jestaun Krize ida, nune’e bele halo kontrollu.

“Tanba tuir informasaun ne’ebé ami simu katak Falintil-Forsa Defeza Timor-leste (F-FDTL) hosi nasionál sei dezloka mai ami-nia munisípiu hodi halo seguransa no kontrolu hamutuk ho Polísia Nasionál Timor-Leste. Tanba ne’e presiza kria komisaun ida, nune’e tau-matan no kontrolu ba movimentu populasaun Viqueque nian hosi aldeia, suku, no postu administrative sira,” nia dehan.

Kona-ba atividade eskolar, Adminiatradór Viqueque hateten, komesa horisehik suspende to’o loron 19 marsu, bainhira rona iha abitante ida afetadu moras COVID-19 entaun Postu Administrativu Viqueque ho Uatulari deside suspende kedas atividade eskolár.

Aleinde de ida-ne’e, nia dehan, atividade negósiu iha merkadu Viqueque nian mantein la’o nafatin tanba povu sira presiza nesesidade bázika, maibé importante maknegosiante sira tenke kumpre regra no movimentu labele barak liu.

“Ida-ne’e, ita sei halo koordenasaun ho parte seguransa inklui ho autoridade sira iha Viqueque inklui ho dirasaun Administrasaun Munisípiu Viqueque nian atu oinsá mak implementa serka sanitária iha Munisípiu Viqueque ne’e ho loloos,” Boly hateten.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here