Ilustrasaun Loron Mindiál Direitu Konsumidór. Imajen/Arpit

DILI, 15 marsu 2021 (TATOLI)—Asosiasaun TANE konsumidór husu ba operadór ekonómiku sira respeitu direitu konsumidór, liuhosi prátika di’ak ba jestaun tau folin sasán no lebel validade produtu iha merkadu.

TANE hato’o kestaun kestaun ne’e relasiona ho selebrasaun Loron Mundiál ba Direitu Konsumidór iha 15 marsu.

“Iha selebrasaun tinan ida ne’e la hanesan bain-bain, bele iha konfinamentu, TANE nafatin ho imi. Ami kontinua apoiu timor-oan hotu liuhosi telefone, email no facebook, atu imi-nia direitu bele hetan respeitu nafatin,” refere  nota ne’ebé Agência TATOLI asesu, segunda ne’e.

Iha loron 15 marsu 1962, Prezidente  Estadu Unidu Amérika (EUA), John F. Kennedy, afirma importánsia konsumidór ne’ebé sai marka fundamentál ba defeza direitu konsumidór sira iha mundu tomak, liuliu direitu ba informasaun, seguransa, livre atu hili no ema bele rona.

Iha ámbitu selebrasaun ne’e, iha konteksu Timor-Leste, TANE subliña direitu konsumidór atu hetan informasaun fundamentál hanesan, dahuluk, operadór ekonómiku sira tenke tau folin ba sasán no servisu sira ne’ebé durante ne’e asosiasaun nota katak seidauk iha prátika di’ak.

“Nune’e, bele iha jestaun di’ak ba orsamentu konsumidór no sira-nia konsiénsia iha merkadu, depende hatene antes folin sasán ho forma loloos, ne’ebé sira hanoin atu hola,” nota esplika.

Daruak, asesu ba lebel iha lian portugés ou tetun iha produtu hotu, nune’e konsumidór bele hatene loloos ingrediente, origin no indikasaun atu hili loloos.

Ikus liu, indikasaun ba validade produtu ai-han, tanba barak mak laiha data validade iha lebel, ne’ebé tau risku boot ba saúde no seguransa konsumidór sira.

Asosiasaun ba direitu konsumidór ne’e, konsidera loron-loron sempre selebra loron konsumidór liuhosi servisu ne’ebé fó defeza maka’as ba direitu no lejítimu interese konsumidór sira.

“Desde asosiasaun ne’e eziste, ami informa no fó apoiu ona konsumidór sira ne’ebé kontaktu ho ami hodi aprezenta sira-nia dúvida no reklamasaun, nune’e bele hakotu problema konsumu, ho esforsu mediasaun ho fornesedór sasán no servisu sira, hodi ikus mai fó hatene ba autoridade kompetente sira bainhira nesesáriu,” subliña nota ne’e.

TANE mós fó importánsia ba inisiativa edukasaun no formasaun atu sai dalan ba joven universitáriu no ba komunidade iha merkadu no sentru komersiál sira.

Nune’e, asosiasaun apela ba konsumidór sira bainhira iha direitu ne’ebé ema la respeita no ema viola, kontaktu ba sentru atendimentu hodi bele fó apoiu no prezensiál maski liuhosi distánsia, nune’e bele fó solusaun.

Jornalista: Florêncio Miranda Ximenes

Editora: Julia Chatarina                                     

HAKEREK NO HATÁN

Please enter your comment!
Please enter your name here