Membru PNTL hala'o hela serka sanitaria iha Klinika Kampung Baru, Comoro, Dili, kinta 11 marsu 2021. Imajen Tatoli/Antonio Goncalves

DILI, 15 marsu 2021 (TATOLI)-Komandu Polísia Nasionál Timor-Leste (PNTL) Munisípiu Dili kontinua implementa regra serka sanitária no konfinamentu hodi hein desizaun foun hosi Governu.

Prosedimentu sira kona-ba Serka Sanitária no Konfinamentu iha Kapitál Dili. Imajen/Espesiál

Konsellu Ministru (KM) estraordinária, foin lalais ne’e, deside aplika serka sanitária iha Munisípiu Dili durante loron-hitu, hahú hosi tuku 00:00, loron 09 marsu  to’o loron 15 marsu,  tanba hatu hakotu korrente propagasaun COVID-19.

“Orasida kalan, tuku 23:59 Otl, sei remata implementasaun serka sanitaria no konfinamentu ba kapitál Dili no komandu PNTL prontu kontinua implementa bainhira prolonga tan,” Komandante PNTL Munisípiu Dili, Superintendente Xefe Henrique da Costa, hateten  ba Jornalista sira iha Komandu PNTL Munisípiu Dili, segunda ne’e.

Nia dehan, PNTL kontinua halo operasaun to’o orasida kalan  iha tuku 23:59 Otl  no ekipa Tránzitu  kontinua destaka iha fatin públiku sira hodi halo operasaun ba sirkulasaun transporte públiku sira,  inklui ba funsionáriu no traballadór ba ida ne’ebé laiha nesesidade urjente no la hetan despaxu hosi instituisaun sei haruka fila-fali ba uma.  

Tuir observasaun Agência Tatoli iha kapitál Dili hatudu loza sira ne’ebé la’ós fa’an sasán esensiál hanesan nesesidade báziku taka ka suspende sira-nia atividade, laiha sirkulasaun transporte públiku hanesan mikrolete ho taxi. Maibé movimentu komunidade nian ho transporte privadu (karreta no motór ) komesa fali ona hodi ba atende ida-idak nia nesesidade privadu no serbisu nian.

Operasaun hanesan iha domingu horiseik  ne’ebé envolve mós forsa Komandu Espesiál Polísia (COE) iha estrada protokolu sira hodi haruka fila abitante sira ba tuur hakmatek iha ida-idak nia uma la iha ona.  Tanba ne’e, movimentu iha fleksibilidade uitoan.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here