Membru PNTL hala'o hela serka sanitaria iha Klinika kampung Baru, Comoro, Dili, kinta 11 marsu 2021. Imajen Tatoli/Antonio Gonçalves

DILI, 15 marsu 2021 (TATOLI)-Komandu Polísia Nasionál Timor-Leste (PNTL) Munisípiu Dili buka hela suspeitu ka ema deskoñesidu   balun  ne’ebé tuda  ekipa saúde sira bainhira ba foti pasiente COVID-19 iha área Luru-Mata, Dili, domingu kalan.

Komandante PNTL Munisípiu Dili, Superintendente Xefe Henrique da Costa, informa, iha domingu kalan, purvolta  iha tuku 21:00 Otl,   bainhira ekipa saúde atu ba foti pasiente ne’ebé suspeita COVID-19 iha area Luru-Mata hetan tuda hosi ema deskoñesidu balun.

Notísia Relevante : COVID-19, ema tuda ekipa saúde bainhira foti amostra swab

Momentu ne’ebá kedas, Henrique da Costa tenik, parte PNTL Eskuadra Dom Aleixo   hetan apoiu mós hosi Unidade Espesiál Polísia (UEP)  halo patrullamentu iha area refere hodi hakalma, maibé ema deskoñesidu ne’ebé deskonfia halo distúrbiu tuda ekipa saúde  halai lakon.

“Iha akontesimentu ne’e karreta ambulánsia hetan tuda  iha parte karreta-nia isin-lolon, maibé  la rezulta aat ka laiha vidru ruma fera no laiha pesoál saúde   ne’ebé kanek,’’ Superintendente Xefe, Henrique da Costa, informa ba jornalista, segunda ne’e, iha Komandu PNTL Munisípiu Dili.

Nia husu komunidade atu koopera bainhira ekipa saúde tun ba iha terrenu atu  foti amostra ka pasiente ruma ne’ebé suspeita ba COVID-19 hodi nune’e  bele kontribui ba prevensaun no hakotu korrente ba transmisaun pesti letál COVID-19 .

Komandu PNTL Dili husu ba parte  ekipa saúde sente la seguru tun iha terrenu atu komunika ho parte PNTL nune’e polísia halo akompañamentu.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here