Komunidade iha suku Comoro, kapitál Dili, troka voucher iha supermerkadu Leader ho produtu Cesta Bázika, kinta (10/12). Imajen TATOLI/António Gonçalves

DILI, 15 marsu 2021 (TATOLI)–Ministériu Koordenadór Asuntu Ekonómiku (MKAE) husu ba ministériu implementadór programa Cesta Bázika sira atu hatama relatóriu ba Ministériu Finansa (MF) hodi aselera pagamentu ba empreza distributór.

Tuir Ministru Koordeandór Asuntu Ekonómiku, Joaquim Amarál, pagamentu atu lalais depende ba ministériu implementadór sira submete dadus ba MF atu prosesa pagamentu.

“Ita iha osan no daudaun standby iha sistema maibé agora hein de’it dadus hosi ministériu implementadór hodi hala’o prosesu administrativu atubele halo ona pagamentu,” Ministru Joaquim informa iha edifísiu Ministériu Finansa, Aitarak-Laran, segunda ne’e.

Governante ne’e husu ba ministériu implementadór sira atu serbisu intensivu liután ho MF, tanba bainhira MKAE konfirma ho parte MF, dadus pagamentu empreza seidauk tama sistema.

“Ministériu Finansa mós prosesa ona pagamentu balun, ne’ebé semana ne’e bele ona halo pagamentu ba kompañia distribuisaun Cesta Bázika tanba sira merese ona hetan sira-nia direitu,” nia akresenta.

Distribuisaun Cesta Bázika iha nível nasionál atinje ona 70%, ne’ebé implementa hosi Ministériu Turizmu, Komérsiu no Indústria (MTKI), Ministériu Agrikultura no Peska (MAP), Sekretaria Estadu Ambiente (SEA), Sekretáriu Estadu Kooperativa (SEKoop) no Sentru Lojístika Nasionál (CLN, sigla Portugés).

Programa Governu iha ámbitu rekuperasaun ekonómika ne’e, ho objetivu hodi kria kondisaun liuhosi  aumenta rendimentu  agrikultór inklui apoia família ho nesesidade bázika hodi kombate hamlaha liuhosi kontribuisaun alimentar ne’ebé iha nutrisaun ba uma kain hotu iha Timór laran.

Antes ne’e, MKAE, MTKI no MAP asina despaisu konjuntu atu estende períodu distribuisaun Cesta Bázika to’o 31 marsu, maibé iha ámbitu serka sanitária, atividade ne’e suspende.

Iha fulan kotuk, ministériu implementadór distribui ona Cesta Bázika ba populasaun hamutuk 900.000 no sei falta 595.000.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here