karreta funeráriu iha Liquiça avaria dezde 2020 to’o agora seidauk di’ak. Imajen Tatoli/Hortencio Sanches

LIQUIÇA, 15 marsu 2021 (TATOLI) – Diretór Asaun Sosiál Risku no Dezastre, Ministériu Solidariedade Sosiál no Inkluzaun (MSSI) Munisípiu Liquiça, Abel de Sousa, informa  karreta funeráriu iha Liquiça ida de’it no agora avaria dezde 2020.

Ho kondisaun karreta ne’e, Abel de Sousa hateten, difikulta tebes serbisu importante balun, liu-liu atu tula mate-isin sira hosi ospitál ba postu tolu iha Liquiça laran. Nune’e, durante karreta refere avaria MSSI Liquiça koopera ho diresaun nasionál hosi Dili mak haruka karreta funeráriu hosi Dili mai Liquiça hodi apoiu serbisu tula mate-isin.

Diretór Asaun Sosiál Risku no Dezastre, MSSI Munisípiu Liquiça, Abel de Sousa. Imajen Tatoli/Hortencio Sanches

“Ami ba halo manutensaun iha kompañia Vida Diak iha Lauhata, maibé la konsege hadi’a tanba nia spare parts balu hosi kompañia buka la hetan,” Abel de Sousa, hateten  ba Jornalista sira iha edifísiu MSSI Munisípiu Liquiça, segunda (15/03).

Karreta ne’e Governu sentrál entrega ba MSSI Liquiça iha 2014 liu-ba no to’o iha setembru 2020 nia avaria tanba halo operasaun ba serbisu atende povu iha Liquiça Vila to’o suku remotas sira ne’ebé pertense ba area jurisdisaun Liquiça.

Hosi parte MSSI Liquiça nian loke ona konkursu públiku (CPV/Cost Per View) atu kompañia sira bele manan hodi halo manutensaun. Maske nune’e, to’o loron ikus, ohin, kompañia ida de’it mak hatama dokumentu ka sosa CPV tanba ne’e tenke renunsia fali.

 Jornalista   : Hortencio Sanchez

Editór        : Francisco Simões

HAKEREK NO HATÁN

Please enter your comment!
Please enter your name here