DILI,15 marsu 2021 (TATOLI)-Membru Polísia Nasionál Timor-Leste (PNTL) Munisípiu Dili, Ajente Jaime dos Reis, segunda (15/03), purvolta tuku 05:00 dadeer Otl, hakotu iis derrepente iha nia rezidénsia iha área Golgota, Dili.
Francisco dos Reis, nu’udar oan hosi matebian konta tuir kronolojia ba Agência Tatoli, katak iha tuku 04:00 dadeer, rona nia mama bolu no oan-sira halai tama ba haree nia papa dada-iis arraska to’o tuku 05:00 dadeer Otl, hakotu iis.
“Durante ne’e tuir ami nia hatene sofre hela moras tensaun, ne’ebé dalaruma sa’e dalaruma mós tun,’’ Francisco dos Reis, haktuir.
Mezmu laiha ona iis, maibé família sira halo esforsu evakua ba Ospitál Nasionál Guido Valadares (HNGV), maibé esforsu sira ne’e hela de’it ho esforsu tanba matebian nia iis laiha ona.
“Pai nia iis iha uma tuir ha’u nia hatene laiha ona ne’ebé ba ospitál ne’e hanesan pai nia mate isin maka ba de’it,” Francisco dos Reis hateten.
Matebian Jaime dos Reis nu’udar membru PNTL ne’ebé durante ne’e hala’o knaar iha Eskuadra PNTL Na’in Feto no nia sai polísia hahú iha loron 04 maiu 2002 to’o nia hakotu iis. Matebian husik hela fen-kaben no oan na’in-neen (6); mane na’in-lima no feto na’in-ida.
Jornalista : Nelson de Sousa
Editór : Francisco Simões
