Saudozu ONDA BUI ho nia maluk luta-na’in sira. Imajen/Espesiál.

DILI, 14 marsu 2021 (TATOLI)—Família kolega kombatente sira, iha sesta-feira loron 12 marsu 2021 horsehik, haloot restu mortal Saudozu Vital dos Reis Coreia “ONDA BUI” iha Jardim dos Herois Metinaro, Dili. Saudozu mate iha ai-laran iha loron 06 fulan jullu tinan 1994, bainhira operasaun militár Indonézia iha Suku Ostico-Vemase-Baucau tanba samodok mak tata.

Fiar ka la fiar, aban-segunda-feira loron 15 marsu, Saudozu ONDA BUI halo ninia aniversáriu ba dala-61 (15 marsu 1960-15 marsu 2021), saudozu nia restu mortál ne’ebé haloot ona iha fatin dignu iha Jardim dos Heroi Metinaro ne’e, ninia klmar mós moris hakmatek hamutuk ho ninia luta maluk sira iha lalehan ne’ebá, hodi selebra ninia aniversáriu ho domin.

Iha luta libertasaun patria no povu Timor-Leste hosi invazor Indonézia, liuliu iha 1975, iha baze de apoiu ne’e saudozu ONDA BUI serbisu nu’udár membru hosi grupu apoia movel no lori hahan ba Forsa Armada iha área Wailale, Buila Bu No Watacaa-Mana.

Iha tinan 1977, baze de apoíu rahun, Saudozu Vital dos Reis Correia tun mai villa hamutuk ho populasaun iha Uailili. Maske fila mai villa, nia nafatin iha esperansa hodi kontinua luta ba libertasaun patria hodi oragniza maluk sira seluk no buka dalan oinsá nafatin iha ligasaun ho komandu FALINTIL nian iha ai-laran.

Iha 1978-1979, saudozu ho nia maluk sira hahú organiza malu ne’ebe lidera hosi Saudozu Nazario Xavier “Silisana” iha tinan ida-nia laran, iha Komandante David Alex Daitula nia mahon okos, sira konsege harii sira-nia rede klandestina ida hanaran ‘MIPLIN’ iha Suku Uailili.

Iha tinan 1979, halo enkontru ho komadante David Alex Daitula, Komandante Sico Tai-Naa. Fatin enkontru iha Irabí Uaimanu Boe, ne’ebé lidera hosi Saudozu Nazario Xavier (Silisana), sira aprezenta ba komandante David Alex Daitula no komandante Sico Tai-Naa, kona-ba sira-nia Organizasaun MIPLIN, ne’ebé sira harii iha Suku Uailili hodi apoia ba planu FALINTIL nian ne’ebé la’o tuir orientasaun komandu da luta nian.

Imajen/Espesiál.

Iha tinan 1980, saudozu Vital dos Reis Coreia (Onda) hamutuk ho nia kamarada sira hanesan Saudozu Silisana, Saudozu Nosiki, Martinho, Saudozu Jorge, Saudozu Julião, Alsira no Virginia, sira hamutuk hodi kontinua haboot sira-nia Organizasun MILPIN (Milísia Para Libertasaun Nasionál), atu atende no kumpre orden komandu bainhira iha orientesaun hosi komandu forsa FALINTIL nian.

Iha tinan 1980, zaudozu Vital dos Reis Correia (Onda) servisu hanesan RATIH (Rakyat Terlatih) servisu hamutuk ho BABINSA (Bintara Pembina Desa) Suku Uailili nian, ne’ebé mós servisu atu halo observasaun ba situasaun Movimentu Forsa TNI (Tentara Nasional Indonesia) nian iha Suku Uailili.

Iha 1983, Saudozu Vital dos Reis Coreia (Onda) ho nia maluk sira prontu ona atu hala’o orientasaun Komandu FALINTIL, ne’ebé planeadu ona, halo levantamentu no lori-sai kilat hamutuk sia (9) ho totál membru ne’ebé mak ha;ai sai ba ailaran hamutuk 32. Pesoál sira ne’ebé halai sai ba ai-laran ne’e inklui Saudozu Vital dos Reis Coreia (Onda) no levantamentu ne’e lidera hosi Adjuntu Nazario Xavier “Silisana”.

Ema sira-ne’ebé halai ba ai-laran, hamutuk ema na’in-32 ne’e mak hanesan; Nazario Xavier “Silisana”, Serafin Xavier “Hakat La Fila”, Cesar M. Ximenes “Haksolok”, Vital dos Reis Coreia “Onda”, Adolfino Gusmao “Fenu Laca”, Sebastiao “Wal-Sa”, Felipe “Mau brani”, Adelino Piedade “Ke’e Rubi”, José Piadade “Borulaku”,  Fransisco Piedade “Loirubi”,  Ana Builai, Mario Piedade “Makera”,  Alarico “Abafala”, Apolinario “Abafala” Agama, Alexandre “Wagarana”, Adriano “Nahamori”, Alberto Festão, Eugenio “Ikan Moruk”, Augusto “Wata-Aba”, Zeferino “Guruca Laleno”, Raimundo “Mauk Moruk”, Mau-buti “Abafala”, João “Maukedo”, Hernio Ximenes “Aaswa’in”, Marcelo Nelson, António “Makadai”, David “Rin Besi”, Ernesto “Mau Mesak”, no Alarico “Daregata”.

Iha tinan 1983-1994, saudozu Vital dos Reis Coreia “Onda” sai ba ai-laran, ba hamutuk ho Komadante Sub Xefe Estadu Maiór FALINTIL, Saudozu David Alex “Daitula”.

Saudozu Vital dos Reis Coreia “ONDA” nu’udár Komadante Sesaun, koloka iha Grupu Segundu Unidade FALINTIL ho Komandante Sub Xefe Estadu Maiór FALINTIL Saudozo David Alex Daitula.

Saudozu Vital dos Reis Correia “Onda” troka Saudozu Komandante Bikis nuudár Komandante Sesaun bainhira Komandante Bikis Mate iha operasaun nia-laran. Bainhira Saudozu Vital dos Reis Correia “Onda” mate, troka kedas ho Komandante Bere-Du’u mak asume fali kargu nu’udár Komandante Sesaun iha Saudozu Komadante David Alex Daitula nia grupu.

Saudozu Vital dos Reis Correia “Onda”, hakotu nia iis no husik hela mundu no ninia kompañeiru luta sira iha situasaun ne’ebé defísil no iha momentu ne’ebá, iha operasaun Militár Indonézia la’o makaas tebes iha área Suku Ostico, Postu Administrativu Vemase.

Nia husik hela mundu ne’e iha loron O6 jullu 1994 tanba Samodok mak tata mate. Nia terus mesak ho nia moras ne’e to’o nia husik hela nia maluk kompañeiru luta sira hotu no mós nia familia tomak iha momentu ne’ebá. Nia mós sente dook tebes hosi família, maibé nia prontu simu no oferese nia moris hodi sosa indepedénsia.

Saudozu Vital dos Reis Correia (ONDA) moris iha loron 15 marsu 1960 iha Uma-Lisan Keus Tame-Daa, Suku Uailili, Aldeia Uai-Manu Boe, Postu Administrativu Baucau Villa, Munisípiu Baucau. Saudozu Moris hosi aman Adão Xavier (Matebian) no inan Eva Alves Pereira (Matebian).

Iha Prosesu luta ba libertasaun patria, durante iha ai-laran, saudozu nia naran revolusionariu (estimadu) ne’ebé nia komandante David Alex Daitula ho nia membru sira hotu bolu saudozu “ONDA BUI”.

Saudozu nia maun-alin sira hamutuk na’in-10 mak hanesan Constancio Xavier Ricardo, Lourenco Antonio Freitas (Matebian), Fulqeria Fraga Xavier, Jeronimo Americo Xavier “Naroman” (Matebian), Luis Roldão Piter, Vital Dos Reis Correia “Onda”, Ona Loy Xavier, João Correia (Matebian), Baptista Pascoal Correia no Benvinda de Carvalho Correia. Saudozu oan ba dala-neen (6) hosi maun-alin na’in-10.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here