Pesoál saúde halo swab ba Ministru Prezidénsia Konsellu Ministru, Fidelis Manuel Leite Magalhães, (08/03/21). Imajen Tatoli/Jogerjo Guterres.

DILI, 12 marsu 2021 (TATOLI)—Koordenadór Forsa-Tarefa ba Prevensaun no Mitigasaun, Rui Maria de Araújo deklara katak, Governu liuhosi Sala Situação Centro Integrado Gestão de Crises (SS- CIGC), nunka subar buat ida kona-bá COVI-19 iha Timor-Leste (TL).

“Sei la subar buat ida, sei hato’o informasaun hotu-hotu ba Povu, tanba ita hotu hamutuk iha batalla ida ne’e. Laiha razaun atu subar buat ida, tanba laiha duni buat ida atu subar,” Rui Maria de Araújo  hato’o asuntu ne’e liu hosi konferénsia imprensa iha Centro Convenções Dili (CCD), sesta ne’e.

Notísia Relevante:COVID-19: pozitivu foun 11 iha Dili, ativu 76

Nia deklara asuntu hodi responde ba ema balun ne’ebé sei ‘diskonfia’ katak moras COVID-19 la ziste no Governu mak politiza.

Médiku ne’e hatutan, iha situasaun Pandemia iha fatin hotu-hotu, mosu mós fenómenu ne’ebé matenek na’in sira hanaran ‘infodemia’ katak informasaun barak demais, no informasaun ne’ebé la informa, maibé ‘dezinforma’ no buka atu kuda dúvida, hamosu deskonfiansa, no halo tauk ema.

Tanba ne’e, autoridade Estadu-nian ne’ebé serbisu loron no kalan atu prevene no mitiga surtu COVID-19 iha Timor-Leste, komprometidu atu hato’o nafatin  informasaun ne’ebé lo’os no faktuál kona-bá buat hotu-hotu relasiona ho COVID-19, liu hosi konferénsia imprensa regulár.

Lori SS-CIGC  nia naran, Doutór Rui fó hanoin ba populasaun katak, Rezolusaun Governu Nº12/2021, 8 marsu kona-bá serka sanitária iha Munisipiu Dili, proibi ema atu tama sai hosi Dili.

“Rezolusaun Governu ne’e mós obriga sidadaun hotu-hotu iha sidade Dili, atu halo konfinamentu domisiliáriu jerál. Ida ne’e signifika, hela iha uma, labele sai. Sai de’it bainhira presiza tanba moras, hola hahán, ka sira ne’ebé halo serbisu esensiál,” nia subliña.

Ikusliu nia apela ba ema hotu-hotu atu tu’ur hakmatek iha fatin no autoridade ne’ebé bele autoriza ema nia-movimentu maka Diretór SS-CIGC, Brigadeiru Jenerál Aluk.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here