Sidadaun fase liman molok tama ba loja. Imajen TATOLI/António Gonçalves

DILI, 13 marsu 2021 (TATOLI)—Ministériu Koordenadór Asuntu Ekonómiku (MKAE) no Ministériu Turizmu, Komérsiu no Indústria (MTKI) hasai despaisu konjuntu atu enserra estabelesimentu públiku atu inpoin distansiamentu sosiál durante períodu serka sanitária no konfinamentu domisiliáriu jerál ba populasaun rezidente Dili.

Períodu serka sanitária hahú loron 09 to’o 15 marsu no bainhira iha nesesidade sei iha estensaun.

Nune’e, Governu deside taka instalasaun no estabelesimentu komersiál, indústria no artesenál públiku, exetu ba estabelesimentu ne’ebé fa’an no fornese servisu nesesidade bázika hanesan loja ka kios fa’an ai-han, servisu médiku, saúde no apoiu sosiál, farmásia, banku, postu abastesimentu kombustível, servisu komunikasaun no eletrisidade inklui servisu kontrolu peste.

Tuir despaisu konjuntu númeru 3/III/2021, ne’ebé Agência TATOLI asesu iha sábadu ne’e, haktuir katak asesu ba servisu ne’ebé loke durante períodu ne’e, tenke asegura distánsia pelu menus      metru ida entre ema ida ho seluk, dizinfeta sasán hirak ne’ebé iha estabelesimentu, ne’ebé iha kontaktu fíziku públiku hanesan sestu no kariñu sasán, odomatan, balkaun no pavimentu.

Notísia relevante: Reuniaun KM: deside serka sanitária iha Dili durante loron hitu

COVID-19: pozitivu foun 11 iha Dili, ativu 76

Aleinde ne’e, tenke uza máskara ne’ebé taka inus no ibun iha fatin públiku no fase liman bainhira tama iha estabelesimentu abertu públiku.

Ba vendedór ambulante hanesan ‘tiga roda’ no ai-leba, permite halo atividade komersiál ne’ebé fornese ai-han, nesesidade bázika hanesan produtu ortikultura, maibé labele halibur ema barak no kumpre medida saúde.

Enkuantu ba atividade restaurante no warung, bele kontinua loke maibé tenke iha distánsia entre ema, ka aplika rejime take away (falun), home delivery (entrega iha uma), ka loke tuir oráriu.

Ba otél sira permite bele loke, ho kondisaun atividade alojamentu kondisiona ho regra saúde.

Ba setór ekonómiku seluk, durante períodu enserramentu estabelesimentu komersiál, bele adota inisiativa alternativa komersiál ne’ebé permite kontinuidade atividade ekonómika privada, ho kondisaun kumpre regra distansiamentu sosiál no evita halibur ema barak iha fatin ida ka aplika rejime home delivery.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here