iklan

NASIONÁL, EKONOMIA, DILI, HEADLINE

To’os-na’in iha Tasmania husu Timor-oan 300 ba serbisu ku’u ai-fuan

To’os-na’in iha Tasmania husu Timor-oan 300 ba serbisu ku’u ai-fuan

Embaixadora Timor-Leste ba Austrália, Ines da Almeida, kaer-liman ho Primeiru-Ministru Taur Matan Ruak, bainhira hasoru-malu iha Palaçio do Governo, 28 janeiru 2020. Imajen Tatoli/Antonio Goncalves

DILI, 12 marsu 2021 (TATOLI) – To’os na’in sira iha Tasmania, Austrália, sesta (05/03), hasoru malu ho Embaixadóra Timor-Leste ba Austrália, Ines da Almeida, hodi husu atu Timor-Leste haruka tan traballadór Timor-oan  na’in-300 para bele serbisu ku’u ai-fuan iha sira-nia kintál.

“Iha sesta semana kotuk, to’os na’in-rua hosi Tasmania mai hasoru malu ho ha’u husu Timor-Leste bele haruka traballadór hamutuk 300 hanesan ne’e ba serbisu iha sira-nia to’os atu ku’u ai-fuan iha juñu 2021, maibé situasaun agora preokupante uitoan ba COVID-19 ne’e tanba Australia rigorozu tebes atu la fó ema tama arbiru,” Embaixadóra Ines da Almeida hateten hodi responde ba Agência Tatoli liuhosi mensajen WhatsApp, sesta ne’e.

Notísia Relevante : SEFOPE rejista partisipasaun traballadór feto timor-oan serbisu iha Austrália 50%

Nia dehan, to’os na’in sira mós hatene Timor-Leste agora tama iha zona mean ba COVID-19 ho nune’e mak sai sasidik (obstákulu) ba traballadór sira atu tama ba Austrália.

“Iha ne’e ita hatene katak to’os na’in barak halo ona apelu ba Governu sira nian atu husu traballadór estranjeiru sira atu ba serbisu iha sira-nia to’os, maibé la’ós de’it Timor-Leste iha mós nasaun sira seluk iha Pasífiku ne’e atu mai serbisu ku’u ai-fuan ne’ebé agora barak tebes. Ho situasaun COVID-19 ne’e mak halo Governu Austrália sei tetu uitoan bele ka lae simu traballadór estranjeiru sira,” Ines Almeida hateten.

Durante propagasaun COVID-19 iha Austrália hasai lei ne’ebé rigorozu tebes atu hatán sidadaun hosi nasaun  seluk tama ba Austrália no mós ba sidadaun Australia ne’ebé ba ferias iha rai li’ur mós susar atu fila ba Austrália.

Notísia Relevante : Traballadór timor-oan 19 arranka bá Austrália, ida kansela viajen

Maski situasaun COVID-19 sei sai nafatin sasidik  maibé Embaixadóra Ines Almeida relata ona mai Governu  sentrál e liuliu Ministériu Negósiu Estranjeiru no Kooperasaun (MNEK) oinsá bele haree hamutuk asuntu ne’e, atu  nune’e, iha juñu bele haruka traballadór Timor-oan ba Austrália.

To’os na’in sira mós informa ba Embaixadóra Ines Almeida katak sira prontu aluga aviaun hosi Austrália mai Dili hodi lori traballadór sira ba servisu bainhira Governu Austrália ho Timor-Leste autoriza.

Australia extende vistu traballu ne’ebé inválidu

Biban ne’e, Embaixadóra Ines de Almeida, informa  traballadór Timor-oan barak ne’ebé sira-nia vistu traballu besik inválidu ona, maibé Governu Austrália deside extende tan to’o fulan 12 hodi fó biban ba traballadór hirak ne’e kontinua serbisu.

“Fulan kotuk Governu Australia fó tan oportunidade atu aumenta tan traballadór sira ne’ebé nia vistu inválidu,”  hateten  Ines  da Almeida.

Nia dehan, maski Governu Austrália deside  extende vistu traballu, maibé la taka dalan ba traballadór hirak ne’e hakarak atu fila ba Timor-Leste.

Traballadór hamutuk Timor-oan na’in-230 mak daudaun ne’e sees an ona hosi sira-nia kontratu orijinál hodi aplika fali dokumentu ba temporary protection visas ida ne’ebé fó dalan ba sira hodi livre vistu.

“Ida ne’e hanesan fó imajen ida la di’ak ba ita,” embaixadóra Ines de Almeida hateten hodi afirma tan katak  Embaixada Timor-Leste iha Austrália buka meiu ona hodi ko’alia ho Governu Austrália, liuliu Ministériu Negósiu Estranjeiru iha ne’ebá hodi buka atu rezolve atu labele akontese tan iha futuru.

Jornalista   : Hortencio Sanchez

Editór        : Francisco Simões

iklan
iklan

3 Comments

  1. Ami hakarak husu ba governu Timor Leste no Governu Australia tur hamutuk fó oportunidade ba ami joven sira nebe kbit la iha atu eskola, ami joven Timor prontu bele buka moris atu sustenta ami nia moris

    Ami husu sujere ba Governu Timor Leste fo netik empregu para ami bele buka servisu

Leave a Reply

iklan
error: Content is protected !!