Sala malirin (cool room) ne’ebé Governu Timor-Leste (TL) sei uza hodi rai ai-moruk ba vasinasaun COVID-19, preparadu ona iha armazén sentrál SAMES, Kampung Alor, Dili. Imajen Tatoli/Felicidade Ximenes.

DILI, 12 marsu 2021 (TATOLI)—Sala malirin (cool room) ne’ebé Governu Timor-Leste (TL) sei uza hodi rai ai-moruk ba vasinasaun COVID-19, preparadu ona iha armazén sentrál Serbisu Autónomu Medikametu Ekipamentu Saúde (SAMES), Kampung Alor, Dili.

Diretór ezekutivu SAMES, Santana Martins, hateten sala malirin ne’ebé instaladu, agora daudaun iha hela faze teste.

Notísia Relevante:TL iha kondisaun simu AstraZeneca

“Lojistikamente, semana oin ita bele uza ona sistema ne’ebé instaladu. Ita-nia ekipamentu-sira ne’e foun hotu no ita garante sei bele rai ho didi’ak vasina ne’ebé mak atu mai,’’ Santana Martins hateten ba jornalista-sira iha armazén SAMES, sesta ne’e.

Nia klarifika katak, antes ne’e TL iha ona sala malirin ne’ebé instaladu iha armazén rejionál sira, inklui Rejiaun Administrativa Espesiál Oe-cusse Ambeno (RAEOA), no tinan ida ne’e SAMES halo esforsu hodi halo instala-tan sala malirin foun ida iha armazén nasionál.

Kona-bá espasu atu rai ai-moruk vasina COVID-19, diretór ezekutivu SAMES ne’e dehan, sasán ne’ebé sei mai ho nia periúdu no volume 3% to’o 5% bele akomoda hela.

Entretantu, kompañia Startec Enterprise mak halo instalasaun ba sala malirin ne’e tanba hetan konfiansa hosi Organizasaun Nasaun Unida ba Fundu Labarik (UNICEF), ne’ebé iha esperiénsia espesiál ba área instalasaun sala malirin no manutensaun.

Materiál no ekipamentu ne’ebé uza hodi halo instalasaun ne’e mai hosi UNICEF ho orsamentu rihun $8-resin.

Instalasaun ne’e kompletu ho kurum rua, ida ba temperatura normál no ida seluk ba temperatura malirin menus grau-sélsiu 20.

Notísia Relevante:SAMES instala ona sala malirin atu rai vasina COVID-19

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here