Profesora ida iha Eskola 5 maiu Becora Dili, habai hela livru ne’ebé bokon hafoin inundasaun iha marsu 2020. Imajen/Tatoli.

DILI, 11 marsu 2021 (TATOLI)—Profesór Honório Lobo hosi eskola Ensinu Báziku Sentrál (EBC sígla portugés) 02 Kabira-oan, Munisípiu Viqueque, sujere ba profesór hotu-hotu iha Timor laran tomak, atu hamoris kultura lee iha eskola-sira hahú kedan hosi ensinu báziku, sekundáriu to’o ensinu superiór.

Sujestaun ne’e, tanba tuir profesór Honório Lobo nia haree katak, kualidade edukasaun Timor-Leste la depende de’it ba fasilidade ne’ebé kompletu iha eskola-sira, maibé importante mós oinsa motiva labarik-sira atu lee barak nune’e hariku sira-nia koñesimentu iha mundu siénsia-nian.

“Ita-nia oan sira atu matenek ne’e tenke hatoman sira atu lee. Bainhira sira lee barak, sira sei koñese mundu,” Honório hateten ba jornalista Agência Tatoli, via telefónika, kinta ne’e.

Iha esperiénsia hanorin, Honório Lobo deskobre frakeza boot ida maka, estudante barak mai hosi uma laiha preparasaun tanba iha matéria ne’ebé fó ona, barak mak la domina.

“Ne’e tanba sira laiha vontade atu lee bainhira fila ona ba uma. Ida ne’e realidade ida iha eskola  hotu-hotu,” nia hateten.

Profesór Honório konsidera situasaun ne’e mós kontribui tebes ba kualidade edukasaun iha TL tuun kompara ho nasaun-sira iha sudeste Aziátiku.

Entretantu, totál estudante ne’ebé hala’o estudu iha eskola ne’e hamutuk 485, ho profesór na’in 30 kompostu hosi permante 14 no kontratadu 16.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here