Administradór Postu Administrativu Venilale, Carlos Alberto Guterres.

DILI, 12 marsu 2021 (TATOLI)–Administradór Postu Administrativu Venilale, Munisípiu Baucau, Carlos Alberto Guterres, hateten parte área rurál mós presiza kontribui desizaun Konsellu Ministru ne’ebé deside serka sanitária semana ida (9-15 maret) ba Munisípiu Dili.

Notísia Relevante: Serka sanitária: bandu kualker via dezlokasaun hosi munisípiu mai Dili

“Maske serka sanitária implementa iha Munsípiu Dili maibé populasaun iha foho hanesan iha Venilale hakmatek iha ida-idak nia uma inklui movimentasaun transporte públiku hanesan bemo  lahalai. Ami parte munisípiu no postu administrativu mós tenke kontribui ba desizaun ne’ebé Konsellu Ministru aprova,” Carlos Alberto Guterres hateten ba Agência TATOLI  liuhosi telefónika, sesta ne’e.

Nia hatutan, bainhira komunidade sai hosi uma atu ba sosa nesisidade ruma, sira sempre uza máskara no halo distánsia sosiál no fíziku iha fatin públiku sira.

“Kona-ba prevensaun, ami-nia komunidade iha ne’e sempre kumpre fase liman, distánsia sosiál no fíziku, uza máskara. Dala ruma iha komunidade balun mak la uza maibé maiória uza bainhira tama iha fatin públiku sira hanesan merkadu no atividade eskolar inklui relijiozu,”  nia hateten. 

Carlos hateten, labale hanoin katak ema iha nasionál de’it mak kumpre regra Ministériu Saúde (MS) no Organizasaun Mundiál Saúde (OMS) nian, maibé komunidade iha Venilale mós kumpre no kontribui ba prevensaun ne’e.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here