DILI, 12 marsu 2021 (TATOLI)—Administradór Munisípiu Aileu, Abel da Conceição, hateten desde Dili aplika serka sanitária ka konfinamentu obrigatóriu, Munisípu Aileu mós foti kedas medida hodi halo enkontru ho parte saúde nian hodi halo sensibilizasaun kona-ba prevensaun COVID-19 ba komunidade loro-loron.
Abel da Conceição hatutan, iha senbilizasaun ne’e aleinde fó sensibilizasaun kona-ba oinsá abitante sira atu hadook aan hosi moras COVID-19 hodi uza máskara, fase liman ho sabaun, no kumpre distánsia sosiál, nia mós husu ba abitante sira atu labele halo viajen ba Dili tanba jeografikamente Munisípiu Aileu baliza ho Munisípiu Dili.
“Bainhira Dili aplika serka sanitária, ha’u halo kedas enkontru ho parte saúde no seguransa munisípiu nian, foti medida loro-loron ekipa saúde prevensaun COVID-19 nian, halo sensibilizasaun ba ita-nia komunidade oinsá sira bele prevene aan hosi virus ne’e. Ita mós husu komunidade atu iha konsiénsia labele halo viajen ba Dili,” Adminstradór Munisípiu Aileu, Abel da Conceição, hateten ba Agência TATOLI liuhosi telefónika, sesta ne’e.
Nia dehan, sensibilizasaun prevenasaun COVID-19 ne’ebé daudaun ne’e sira hala’o sei kontinua nafatin to’o moras COVID-19 ne’e mihis no lakon hosi Timor-Leste, tanba virus ne’e mai la haree no la fihir ba boot ka kiik, entaun di’ak liu prevene antes duké akontese tiha mak hafoin kura.
Reprezentante Governu Sentrál iha munisípiu ne’e informa, atividade ka movimentu ema no transpote públiku sira iha Munisípiu Ailleu ne’e la’o normál tanba sira halo viajen lokál de’it.
“Maibé, iha ne’e, ita kumpre nafatin protokolu saúde nian liuliu hosi minsitériu saúde no organizasaun mundiál saúde nian hanesan uza máskara, fase liman ho sabaun ka uza hand sanitizer, distansiamentu sosiál,” nia dehan.
Haree hosi parte ba seguransa, nia dehan, durante Dili aplika serka sanitaria ne’e komandu Munisípiu Aileu tau kedas postu provizóriu iha fatin sira-ne’ebé baliza kedas ho Munisípiu Aileu mak hanesan Kunsin Casnafar, Erabat, no mós Seloi Craik.
”Objetivu tau postu seguransa ne’e, atu ita-nia ema balun ne’ebé koko atu halo viajen ilegál, ita-nia pesoál seguransa sira halo kedas asaun. Tanba, durante Dili aplika serka sanitária, iha abitante balun ne’ebé hela iha Dili tenta atu halo viajen ilegál mai Munisípiu Aileu maibé parte seguransa deteta no haruka sira fila-fali ba Dili,” nia dehan.
Jornalista: Arminda Fonseca
Editór: Cancio Ximenes.
