Fronteira terrestre Batugade. Imajen TATOLI/António Gonçalves

DILI, 12 marsu 2021 (TATOLI)--Ministériu Interiór (MI) liuhosi despaisu ba Xefe Setór Fronteira, ho autorizasaun hosi Sala Situasaun Sentru Intagradu Jestaun Krize (CIGC, sigla portugés), autoriza sidadaun Indonézia hamutuk na’in-10, ne’ebé hanesan traballadór ba servisu esensiál iha área infraestrutura, tama mai Dili liuhosi fronteira terrestre Batugade, postu administrativu Balibo, munisípiu Bobonaro, iha loron kinta (11/03).

“Loos duni katak iha kinta horiseik, iha sidadaun Indonézia hamutuk na’in-10 tama mai Timór liuhosi fronteira Batugade. Ha’u mak hasai duni despaisu, ne’ebé autoriza mós hosi Ministru Interiór no Primeiru-Ministru, Taur Matan Ruak, atu autoriza traballadór sira ne’e tama mai Dili, sira nu’udar traballadór Portu Tibar no Ponte Soibada. Razaun autoriza atu aselera servisu esensiál sira,” Vise-Ministru Interiór, António Armindo, informa ba Agência TATOLI, via telefónika, sesta ne’e.

Notísia relevante: KM aprova medida ezekusaun EE ba da-11

Reuniaun KM: deside serka sanitária iha Dili durante loron hitu

Tuir governante ne’e, traballadór sira ne’e daudaun submete ona ba kuarentena loron 14 no empreza mak responsabiliza.

“Sira kumpre medida Estadu Emerjénsia (EE), tanba ne’e sira tama kedan iha kuarentena ne’ebé empreza mak selu rasik,” nia akresenta.

Vise-Ministru dehan, tuir planu iha semana oin traballadór hosi Xina sei mai Timór.

“Traballadór ba servisu esensiál sira hamutuk 100-resin sei mai no empreza mak sei selu rasik aviaun, sira sei mai ho aviaun Atlantic, bainhira to’o iha Timór sei submete hotu ba kuarentena loron 14 no durante iha kuarentena empreza mak sei responsabiliza kustu,” nia hatutan.

Entretantu, bazeia ba Dekretu Governu númeru 6/2021 02 marsu, kona-ba medida ezekusaun deklarasaun Estadu Emerjénsia, iha artigu 15 kona-ba enserramentu temporáriu postu fronteira, hateten katak iha kazu esesionál ne’ebé justifika ho razaun saúde no seguransa populasaun, MI bele determina enserramentu temporáriu postu fronteira ka halo redusaun oráriu atendimentu públiku.

Iha artigu 6 kona-ba obrigatoriudade kontrolu sanitáriu, hateten katak maski iha aplikasaun EE bandu pasajen fronteira terrestre ba fins tradisionál no kostumeiru no asesu merkadu reguladu, maibé define katak entrada estranjeiru iha territóriu nasionál liuhosi pontu fronteira terrestre tenke iha autorizasaun prévia hosi MI, hafoin pareser hosi Ministériu Saúde.

EE da-11 abranje territóriu nasionál tomak no vigora hahú oras 00:00 loron 04 marsu 2021 to’o oras 23:59 iha loron 02 abríl 2021

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here