Diretór Serbisu Edukasaun Munisípiu Viqueque (DSEMV), Emídio Amaral. Imajen/facebook.

DILI, 12 marsu 2021 (TATOLI)—Ministériu Edukasaun Joventude no Desportu (MEJD) prevee ona rihun $150 hosi Orsamentu Jerál Estadu (OJE) tinan ne’e, hodi halo reabilitasaun ba eskola Ensino Básico Central (EBC) 02 Kabira-oan, Munisípiu Viqueque.

Diretór Serbisu Edukasaun Munisípiu Viqueque (DSEMV), Emídio Amaral, hateten MEJD prevee orsamentu ne’e bazeia ba proposta hosi DSEMV rasik no hein de’it transferénsia ba konta bankária Edukasaun munisipál atu ezekuta.

Notísia Relevante:MEJD seidauk reabilita edifísiu EBC 02 Kabira-oan

“Ita hein de’it MEJD atu transfere osan ne’e mai, ita bele reabilita ona,” Emídio Amaral hateten ba jornalista Agéncia Tatoli via telefónika, sesta ne’e.

Edifísiu eskola ne’e ahi han iha 8 abríl 2018, kauza hosi sirkuit liña eletrisidade no la konsege salva sala-de-aula tolu.

Edifísiu ne’e rasik konstrui hamutuk ho edifísiu-tolu seluk hosi ajénsia Internasional JICA hosi Japaun, iha tinan 2004-2006.

Totál estudante ne’ebé hala’o estudu iha eskola ne’e hamutuk 485, ho profesór na’in 30 kompostu hosi permante 14 no kontratadu 16.

Jornalista: Tomé Amado

Editór: Cipriano Colo

HAKEREK NO HATÁN

Please enter your comment!
Please enter your name here