Membru PN hosi Bankada FRETILIN, Antoninho Bianco.

DILI, 12 marsu 2021 (TATOLI)—Komisaun D ne’ebé trata asuntu Ekonomia no Dezenvolvimentu aprova ona artigu hamutuk 68 hosi totál artigu 162, maibé oras ne’e labele kontinua tanba konfinamentu obrigatóriu iha ámbitu aplikasaun Estadu Emerjénsia dala-XI.

Notísia Relevante: Komisaun D seidauk finaliza projetu-lei kódigu mineiru

“Ami aprova tiha ona artigu hamutuk 68 tanba projetu-lei iha artigu 162. Planu ami-nian sei konklui iha fulan-marsu (trimestre dahuluk) nia laran liuhosi ezekusaun planu anuál komisaun D nian, maibé ita sei situasaun surtu COVID-19 ne’e,” Prezidente Komisaun D, Deputadu Antoninho Bianco informa ba jornalista sira, iha resintu Parlamentu Nasionál, sesta ne’e.

Nia haktuir, loloos ne’e foin lalais atu debate kontinuasaun iha Munisípiu Liquiçá maibé tanba konfinamentu obrigatóriu entaun adia tiha ba loron seluk.

“Kódigu mineiru ne’e importante bai ta tanba liga bai ta-nia riku-soin rai-leten no tasi. Ezemplu, hanesan fatuk sira-ne’ebé iha valór ekonómiku, marmer, simentu, osan-mean, osan-mutin, rai-mutin no rai-mean. Balun valór ekonómiku estratéjiku no la estratéjiku,” nia esplika.

Nia dehan, bainhira projetu-lei ne’e sai lei, sei kria mós fundu ba mineiru, ezemplu hanesan minarai ne’e kria fundu, se lei ne’e konsege atrai investidór sira mai hosi rai-li’ur entaun bele kria fundu mineiru ne’e.

“Kompañia Timor GAP tau matan kona-ba petróleu ninian, kompañia Murak Rai sei haree kona-ba rikusoin mineiru nian. Ne’ebé, projetu-lei ne’e iha vantajen barak loos,” Prezidente Komisaun ne’e dehan. 

Konteúdu hosi projetu-lei kódigu mineiru ne’e regula atividade minerál nian no halo ezersísiu hodi respeita inklui atividade rekoñesimentu preliminár, prospesaun ba-oin no peskiza, avaliasaun, dezenvolvimentu, esplorasaun no tratamentu iha área minerál rai-laran nian.

Nune’e mós transporte no komersializasaun minerál hodi haree fila-fali importánsia ba estadu RDTL, liuliu kuandu atende impaktu no fornesimentu ba matéria prima esensiál sira ba dezenvolvimentu, kresimentu ekonómiku no prosperiedade nasaun nian.

Projetu-Lei Kódigu Mineiru hamutuk artigu 162 ho kapítulu 20 no anexu 3. Artigu 1 define aprovasaun kódigu mineiru, artigu 2 define polítika mineira, artigu 3 define objetivu sira kona-ba estratéjia setór mineiru nian no ikus liu artigu 162 ne’ebé define dispozisaun tranzitória.

Iha loron 30 jullu 2020 liubá, projetu-lei númeru 4/V(1a) kona-ba kódigu mineiru ne’e aprovadu iha faze jeneralidade ho rezultadu votasaun a-favór 54, kontra 0 no abstensaun 0.

Proponente ba projetu-lei ne’e mak hanesan Deputada Virgínia Ana Belo, Deputadu Duarte Nunes, Adérito Hugo da Costa, Francisco de Vasconcelos, António Nobre Tilman, Maria Fernanda Lay, Maria Terezinha Viegas, Mariano Assanami Sabino, António da Conceição no Maria Angelina Lopes Sarmento.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here