David da Silva da Costa. Imajen/Espesiál

DILI, 12 marsu 2021 (TATOLI)–Inan la iha, aman mós la iha. Inan-aman la iha tan “matebian” ona, halo David da Silva da Costa hamutuk ho nia maun-bin sira moris nu’udar oan-ki’ak. Lakon domin, lakon buat hotu. Nia, maun-bin, sira hamutuk na’in neen (feto tolu, mane tolu).

David hosi aldeia Fohei, suku Rotutu, postu administrativu Same, munisípiu Manufahi, Nia aman matebian naran Armando da Costa, mate iha tinan 2013 bainhira David iha semestre 1 no nia inan Rosantina da Silva, mate iha tinan 1992. David hanesan oan ikun. Nia maun no bin sira harii uma-kain hotu ona. Agora dadaun David hela ho nia maun daruak iha Taibesi.

Rotutu-oan ne’e, antes ne’e, eskola no estuda iha Universidade Oriental Timor Lorosa’e (UNITAL), Fakuldade Ekonomia Departamentu Turizmu, maibé paradu tanba situasaun no kondisaun ekonomia ne’ebé nia hasoru nu’udar oan-ki’ak ida.

“Kona-ba eskola, ha’u eskola. Maibé, haree ba ekonomia, osan atu sustenta laiha. Ho ida ne’e, ha’u foti dalan ida atu fa’an sasán sira hanesan ne’e atu muda moris no karik osan iha ha’u mós bele kontinua fali,” David konta nia moris, iha entrevista ida ho jornalista Agência TATOLI ho neon-susar no esperansa, iha estrada ibun Caicoli, besik Fakuldade Siénsia Sosiál (FSS), Universidade Nasionál Timor Lorosa’e (UNTL), Dili, foin lalais ne’e.

David da Silva da Costa agora tinan 29. Bainhira entrevista, hatais faru kór kinur, kalsa levis metan naruk, tara pasta kor azúl nakukun no tau máskara kór mean, kaer nia sasán ne’ebé nia fa’an hanesan sigarru no pulsa iha liman ho oin hamnasa hasoru estudante, kondutór no ema sira ne’ebé la’o iha nia oin, ba mai.

Nia lorloron hala’o nia atividade hanesan negosiante dalan-ninin fa’an sasán sira hanesan bee aqua, sigarru ho marka hanesan Malboro, LA. Nia mós fa’an pulsa hanesan Telemor, Timor Telecom (TT) no Telkomcel. Nia sempre ho oin hamnasa hasoru ema sira ne’ebé mai hola nia sasán hirak ne’e no sempre goza malu ho ema sira ne’e.

Bainhira estudante sira iha resintu universidade nian bolu atu hola bee, sigarru no pulsa, nia halai hosi estrada sorin ba iha estrada sorin, korta karreta ho motor mak hafoin nia fó sasán ba sosa-na’in sira ne’e. Nia nunka kole no suspira halai ba mai. Nia sempre atende ho kontente, tuir observasaun TATOLI nian, iha meudia loron manas ne’e. Iha ai-matan dukur hun boot ne’e nia okos no mahon, entre edifísiu Ministériu Solidariedade Sosiál no Inkluzaun (MSSI) no FSS, UNTL, ne’e.

David da Silva Costa hahú fa’an sigarru, bee no pulsa hahú tinan 2019. Alin ikun hosi maun no bin na’in lima ne’e hateten, nia fa’an sasánn hirak ne’e alende hanesan oan-ki’ak hodi sustenta nia moris maibé mós hanesan foinsa’e ida lakohi lakon tempu ba buat folin-laek sira no halo buat ne’ebé negativu iha sosiedade nia matan.

“Objetivu ha’u fa’an tanba hanesan joven ita labele hanoin mak problema, labele hanoin mak buat ne’ebé halo tuun sa’e hodi estraga. Nune’e, do que halimar iha uma ita tenke iha objetivu ruma ba aban bainrua oinsá atu muda ita-nia moris,” nia konsidera.

Bainhira inan-aman la iha ona, David kompara, buat hotu la fasil ona hanesan inan-aman kumpletu. Katak, tenke hisik-kosar rasik, fiar iha liman-fuan rasik. Todan ka kama’an hasoru rasik. Uitoan ka barak buka rasik, fiar iha an rasik, depende ba esforsu rasik. Maske nune’e, tuir nia, fiar katak ho dezafiu no difikuldade sira ne’e enkoraja liután nia an atu halo nia mehi bele sai realidade. Iha mudansa ba moris. Iha mudansa ba futuru. Importante mak, David dehan, esforsu aan ho pasiénsia.

“Ha’u-nia mehi mak atu muda duni ha’u-nia moris, tanba mai hosi família ne’ebé ki’ak no simples. La’ós dehan fa’an agora muda agora kedan maibé neineik ba bebeik ho pasiénsia ho hanoin ne’ebé mak ita hakarak, esforsu ne’ebé mak ita iha, buka meius oinsá para iha futuru iha mudansa ba ita-nia moris” David nafatin ho hamnasa-midar hodi konta tuir nia mehi ne’ebé mak iha.

Halai tuun no sa’e, hamriik iha dalan-ninin hosi dadeer to’o lorokraik. Loron ba loron, semana ba fulan no tinan. Hahú hosi 2019 to’o agora, alin ikun hosi maun-bin na’in lima ne’e fa’an sasán. Bainhira fa’an sasán, kada loron hetan rendimentu $15 se lae $10 konforme tempu, depende ba atividade létiva iha FSS la’o no la feriadu.

Maibé, bainhira eskola feriadu mak loron ida dalaruma hetan osan hamutuk $9 lae $7 de’it. Tanba nia fa’an ne’e ba iha estudante sira, funsionáriu, kondutór no ema ne’ebé halo movimentu ba mai.

Iha meiudia dia ne’e, nu’udar joven ida, David da Silva da Costa mós ba foinsa’e sira; tantu feto no mane, katak tenke hanoin “pozitivu” iha moris hanesan labele hanoin buka problema no hemu alkool ka tua maibé importante tau iha hanoin no rai iha fuan katak esforsu aan nafatin hadi’a moris. Nasaun ba oin presiza juventude sira.

“Ha’u-nia mensajen nu’udar juventude lalika hanoin mak problema no hemu tua de’it hodi lanu, maibé esforsu aan badinas no kontrola ita-nia aan atu nune’e iha futuru ita bele dezenvolve no muda ita-nia moris ba aban bairua tanba nasaun presiza ita joven sira,”  nia hato’o.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here