Deputadu António da Conceição. Imajen Tatoli/ Rafy Belo.

DILI, 12 marsu 2021 (TATOLI)—Xefe Bankada Partidu Demokrátiku (PD), Deputadu António da Conceição, fó hanoin ba Governu liuhosi Ministériu Solidariedade Sosiál no Inkluzaun (MSSI) atu hamosu medida hodi apoia família kbiit laek iha aplikasaun serka sanitária no konfinamentu obrigatóriu iha sidade Dili.

“Ha’u hanoin Ministériu Solidariedade Sosiál bele hamosu medida seluk hodi apoia umanitária ba família vulnerável (laiha kbiit) iha sidade Dili tanba família balun fa’an sasán hodi sosa fali sasán seluk maibé iha aplikasaun serka sanitária no konfinamentu obrigatóriu ne’e sira laiha osan, entaun ne’e Governu tenke hamosu medida ida,” nia informa ba Agência TATOLI, iha Dili, kinta ne’e.

Nia fó hanoin ba MSSI atu koordena ho Sentru Lojístika nasionál (CLN) hodi hasai foos halo atendimentu ba família ne’ebé laiha kbiit iha Sidade Dili.

Nia fundamenta, família balun iha Sidade Dili ne’e iha serka sanitaria no konfinamentu ne’e defísil atu hetan osan tanba movimentasaun transporte públiku mós paradu totál.

“Bele halo atividade sosiál hodi fó netik subsídiu ba família sira-ne’ebé vulnerável, la’ós ho kuantidade boot maibé pelumenus aguenta hodi kumpre konfinamentu obrigatóriu ne’e. Ha’u hakarak atu sujere atu Governu mós tenke hanoin atu husu populasaun atu kumpre maibé mós ajuda populasaun kumpre nune’e sira labele mate tanba de’it hamlaha,” Xefe Bankada PD ne’e rekomenda.

Nia husu ba MSSI liderada Armanda Berta dos Santos, atu asume responsabilidade ne’e hodi halo mós asisténsia umanitária hanesan asaun sosiál ruma tanba situasaun atuál obriga Estadu tau-matan ba povu.

“Se iha tiha ona limitasaun ba transporte públiku nian signifika konfinamentu obrigatóriu, maibé labele husik ema mate tanba hamlaha, entaun ita prevene COVID-19 halo saida,” nia dehan.

Eis Ministru Komérsiu, Indústria no Ambiente ne’e mós husu Governu atu loke kurridór ida-ne’ebé mak fasilita família sira bele haruka hahan ba sira-nia oan sira-ne’ebé eskola no hela iha Dili.

Nia fó ezemplu, aplika serka sanitária Postu Administrativu Fatumean no mós iha Dili konfinamentu hela, maibé administrasaun munisipál Covalima bele kria mekanizmu ida hodi koordena ho Ministériu Administrasaun Estatál, atu fasilita transporte ruma tula hahan ba estudante sira iha Dili.

“Dispoin iha-ne’ebá, depois haruka lori mai Dili hodi distribui ba estudante sira, labarik sira bele ba foti. Ha’u hanoin ne’e depende asaun kreatividade. Bainhira ema laiha hanoin kreatividade ne’e mak paradu ne’e. Enkuantu loke kurridór ne’e signifika bele liuhosi dirasaun ida hodi bele halo atendimentu ba komunidade ne’ebé presiza ai-han,” Eis Ministru Edukasaun ne’e rekomenda.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here