Alípio De Almeida

Hosi:

Alipio De Almeida*

Membru Assosiasaun Médiku Veterináriu Timor-Leste

To’o ohin loron, vírus corona ka COVID-19 domina ema-nian hanoin iha múndu. Tanba pesti ne’e hamate ema besik milaun tolu iha mundu hahú 2019 to’o 9 marsu 2021. Nune’e mos virus African Swine Fever (vASF) halo agrikultór ne’ebé hakiak fahi iha Timor sai trauma, tanba hamate fahi hotu ne’ebé sira hakiak husi 2019 – 2020. COVID perigu ba ita ema, ASF perigu ba ita nia balada fahi sira.

Transmisaun ASF akontese iha teritóriu, hosi setembru to’o dezembru 2019 hamate ona fahi sira ne’ebé agrikultór sira hakiak.

Artigu ne’e ho intensaun atu fahe informasaun ba hotu-hotu ne’ebé nia konesementu menus kona-ba virus nia impaktu, maneira transmisaun no prevensaun ba ita ida-idak nia-án rasik no balada fahi ne’ebé ita hakiak.

Tuir istória Covid-19 akontese dahuluk iha SIDA de Wuhan, Fina iha 2019 no tama iha Timor – Leste iha 2020.

Hahú marsu 2020, to’o ohin loron, hamosu ona Estadu Emergensia ba dala 11 inklui mos serka sanitária iha fatin balun hanesan Kovalima, Bobonaru no Dili. Kazu infetadu aumenta no rekoperadu mos hanesan. Grasa Maromak nian, to’o loron ohin (12/3/2021) seidauk iha ema Timor oan ruma mak mate, tanba Covid-19 iha ita nia rai doben Timor-Leste.

Maske nune’e, virus ne’e nia prezensa iha Timor hamosu problema sosiál no ekonomia, inklui ema lakon servisu, lakon rendimentu no diskonfia bele mós hamosu hanoin no asaun krime bainhira la hetan nesesidade ba moris loro-loron nian.

Iha parte seluk, ho serka sanitária ne’ebé aplika dadaun lori benefisia ba funsionáriu, tanba hakmatek iha uma bele simu saláriu hanesan bai-bain, maibé funsionáriu short time nian iha instituisaun privada no populasaun bai-bain ne’ebé buka moris iha negósiu difísil hetan rendimentu ba nesesidade uma kain loro-loron nian, inklui oan sira nia nesesidade eskola nian.

Impaktu prinsipál husi virus corona mak bele hamate ema sira ne’ebé vulneravel hanesan terseira idade no sira ne’ebé iha ona moras ran midar, kurasaun no tensaun aas.

Covid-19 transmite liuhusi kontaktu direta entre ema ne’ebé infetadu no ema ne’ebésaudavel, bele liuhusi kabeen no inus been ne’ebé kona ema seluk ka kontamina materiál seluk inklui ita nia liman ne’ebé kaer matan, inus, ibun no ai-han ruma.

Ho periodu inkubasaun virus nian maizumenus loron 14 bele hamosu sintoma hanesan mear, inus been, fani, dada iis araska no isin manas no sinál seluk ne’ebé asosia ba moras respiratória nian, diskunfia katak ita ka ema refere infektadu ona virus corona. Husi ne’e, ita nia istória hetan kontaktu husi sé no iha ne’ebé durante ne’e hotu-hotu sai risku ba Covid.

Ita nia governu aprezenta no aplika maneira oi-oin atu prevene populasaun husi virus corona ne’e. Maneira hirak ne’e inklui distansiamentu sosial, desinfekta fatin no sasan ne’ebé diskunfia kontaminadu, fase liman bebeik, uza maskara, kuarentena ho auto-kuarentena ba sira ne’ebé tama husi liur ne’ebé inisia ho Estadu emerjénsia, lockdown, no prepara fasilidade fase liman iha fatin públiku no loja sira, no seluk-seluk tan.

Ba ita nia-án rasik, buat ne’ebé fasil ita halo hodi prevene ita nia-án husi Covid-19 no hasees ema seluk husi moras refere mak: labele sai liur kuandu la nesesita, uza étika kuandu mear no fani tenke taka ibun no inus, uza maskara, soe tissue fo’er iha fatin, labele naran tafui kabeen no inus been iha fatin públiku ne’ebé bele sai risku ba ema seluk, labele naran kaer ibun, matan, fase liman bebeik, no kuandu tama uma tenke fase liman no troka roupa ne’ebé hatais durante ba liur.

Virus ASF
Hanesan ita hotu hatene katak hahú setembru 2019, balada fahi ne’ebé agrikultór sira hakiak iha munisípiu hotu mate, kauza hosi ASF.

ASF la’ós virus foun iha mundu, tanba deskobre ona iha nasaun Áfrika sira iha tinan 100 liu ba. Maibé foun ba Timor, tanba foin deklara nia ezisténsia husi ita governu liuhusi Ministéiru Agrikultura no Peska (MAP) iha 27 setembru 2019.

ASF transmite liuhusi kontaktu direta entre fahi infetadu ho virus refere ho fahi ne’ebé saudavel, bele hada’et indireta liuhusi anin, sasan kontaminadu sira hanesan roupa, sapatu, hahán no bee ne’ebé kontaminadu ona ho ASF. Ita ema ne’ebé han naan fahi kontaminadu ASF mos sai vektór ne’ebé hada’et virus ne’e ba ita nia fahi, inklui mos insekta sira hanesan lalar no kutun fahi nian.

Maske governu estabelese task force ne’ebé lidera husi MAP hodi hasoru moras ASF maibé fahi kontinua mate nafatin. Ida ne’e tanba kolaborasaun ita ema nian ho governu mak seidauk di’ak. Governu bandu movimentu fahi durante surtu ASF maibé sistema hakiak animál no konesementu ne’ebé menus.

Impaktu prinsipál hosi ASF mak afeta diretamente ba rendementu família, má nutrisaun, lakon servisu nst.

Maneira prevensaun ba transmisaun ASF maka utiliza asaun bioseguransa (biosecurity), no muda sistema hakiak fahi ba sistema intensivu, katak fahi iha luhan laran de’it. Utiliza asaun bioseguransa durante hakiak fahi hanesan fase liman, sapatu, no roupa ne’ebé desinfektadu no so uza ba luhan de’it.

Fahi so han hahán ne’ebé livre husi ASF. Limita movimentu ema no sasan tama-sai luhan. Desinfekta sasan ne’ebé nesesaria tama luhan. Hapara movimentu fahi no ema durante surtu.

Prevene ita nia-án atu labele lori virus ASF husi ita nia uma laran ba ita nia fahi luhan liuhusi asaun bioseguransa hanesan fase sapatu no liman, so uza roupa luhan nian ne’ebé desinfekta mak tama luhan, labele hatais roupa iha uma laran nian ba luhan laran, no hamoos fahi luhan bebeik.

Oinsá Covid-19 no ASF tama Timor?

Virus rua ne’e laiha matan hodi haree Timor-Leste ne’e iha ne’ebé. Virus rua ne’e mos laiha ibun atu hateten ba ema ruma hodi lori sira nain rua mai Timor. Virus rua ne’e mos laiha ain hodi la’o ba sa’e aviaun ho roo hodi mai iha Timor. Virus refere mos laiha liman hodi kaer aviaun no roo hodi to’o iha ita rain. Virus rua ne’e mos laiha liras hodi semo mesak husi nia mosu fatin.

Maibé, tanba ita ema nia hahalok mak lori virus Corona ho virus ASF mai to’o ita nia nasaun. Lalaok sira mak movimentasaun ema husi nasaun afetadu seluk hanesan Portugal, Xina, Korea, Indonézia no nasaun seluk mai Timor-Leste. Nune’e mos Importasaun sasan ne’ebé kontaminadu husi nasaun afetadu, la liu husi asaun bioseguransa ne’ebé di’ak, inklui desinfektansia nian, no seluk-seluk tan.

Ema tama ilegál husi nasaun afetadu sira hanesan Indonézia sai hanesan kauze prinsipál transmisaun Corona iha Timor antes transmisaun lokál nian. Nune’e mos importasaun naan fahi ho nia produtu sira ho sasan kontaminadu sira husi nasaun afeta mai ita rain sai hanesan kauza prinsipál ezisténsia ASF iha Timor-Leste.

Ho informasaun hirak mensiona iha leten ne’e, atan ha’u konklui Covid-19 no ASF iha ona ita rain. Maneira adekuadu atu hapara no hasees transmisaun virus rua ne’e maka halo tuir protokolu governu ne’ebé estabelese ona. Ita ida-idak mak responsabiliza ba ita nia saúde ho ita nia fahi nia saúde. Sé la’ós ita no se la’ós agora: Sé tan no bainhira?

Autór aplika hela konfinamentu obrigatóriu iha uma aimutin-hun, Bekusse Kraik, Bekora.

PUBLISIDADEiklan

HAKEREK NO HATÁN

Please enter your comment!
Please enter your name here