Prezidente Konsellu Administrasaun APORTIL, Flávio Cardoso Neves. Imajen TATOLI/António Gonçalves

DILI, 12 marsu 2021 (TATOLI)–Prezidente Konsellu Administrasaun Autoridade Portuáriu Timor-Leste (APORTIL), Flávio Cardoso Neves, hateten, daudaun hahú halo ona rekrutamentu tripulante timor-oan ba Ró Berlin Nakroma 2.

“APORTIL halo rekrutamentu ona no identifika timor-oan ne’ebé iha kapasidade atu sai tripulante, agora iha faze teste fíziku no faze tuirmai entrevista,” Prezidente APORTIL informa iha Portu Dili, sesta ne’e.

Notísia relevante: Ró Nakroma 2 sei to’o Timor-Leste iha setembru tinan ne’e

Tuir nia, iha rekrutamentu hetan aplikante na’in-100 resin, ne’ebé tuir planu iha maiu no juñu, ba hirak ne’ebé liu vaga tripulante sei ba Xina atu akompaña konstrusaun Ró Berlin Nakroma 2.

“Sira ba la hodi ró, maibé akompaña iha ne’ebá durante lala’ok konstrusaun no haree kondisaun reál,” nia akresenta.

Tanba ne’e, APORTIL hakarak buka tripulante ró kualifikadu, nune’e bele envolve mós iha parte tékniku konstrusaun ró.

Nia dehan, Governu liuhosi Ministériu Transporte Komunikasaun sei haree posibilidade balun atu identifika fatin no  halo oráriu ba operasaun Ró Nakroma 2, bainhira to’o ona Timor-Leste.

“Governu sei loke tan fatin balun atu Nakroma 2  bele halo operasaun tuir oráriu no ami iha ona planu ró ne’e halo operasaun iha parte Dili no Manatuto, Baucau, to’o Suai no Beaço,” nia hatutan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here