Distribuisaun Cesta Bázika. Imajen Tatoli/Dok.

DILI, 12 marsu 2021 (TATOLI)—Administradór Postu Administrativu Venilale Munisípiu Baucau, Carlos Alberto Guterres, hateten Postu Administrativu Venilale entrega ona reklamasaun Cesta Bázika 10-20 ba nasionál.

“Povu Venilale simu hotu Cesta Bázika maibé sei reklamasaun hamutuk na’in 10-20 mak seidauk simu maibé ami identifika mak madre no padre sira, nune’e aldeia no suku liuhosi Postu Administrativu Venilale entrega ona ba nasionál,” Carlos Alberto Guterres hateten ba Agência TATOLI via telefónika, sesta ne’e.

Nia hateten, bainhira xefe aldeia ho xefe suku sira identifika reklamante sira ne’ebé seidauk simu ne’e madre no padre sira ne’ebé hela iha kolejiu (asrama) Venilale nian.

“Ita-nia xefe suku no aldeia foti ona reklamasaun hosi asrama rua ka tolu iha Venilale hodi entrega ba nasionál. Ita hein de’it, tanba tuir regra ba Cesta Bázika katak hosi Prezidente to’o mai povu, ne’ebé ha’u fiar katak sira mós sei hetan sira-nia direitu,” Carlos hateten.

Carlos Alberto Guterres hatete populasaun Venilale simu Cesta Bázika hahú iha fulan fevereiru no ramata loron 04 marsu tinan ne’e.

Administradór ne’e hatutan, Xefe família ne’ebé iha Postu Administrativu Venilale hamutuk 4.611 ho nia populasaun hamutuk 15.642 mai hosi suku ualu hanesan suku Bado-Ho’o, Bahamori, Fatulia, Uma Ana-Iku, Uma-Ana Ulu, Uailaha, Uai Oli no Suku Uatohaco.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here