Traballadór sira hatun foos iha Portu Dili. Imajen Tatoli/António Gonçalves

DILI, 11 marsu 2021 (TATOLI)—Responsavel Ekipa Servisu Covalima Vitória ho Domin-20 (EKSES) iha Postu Administrativu Fatumean, Munisípiu Covalima, Fortunato Amaral, hateten uma-kain 300 iha Postu Administrativu Fatumean seidauk simu foos.

Notísia Relevante: MKAE orienta CLN prepara distribuisaun foos ba Covalima-Bobonaro

Nia informa, foos ne’ebé antes ne’e apoiu hosi Governu no ekipa EKSES iha Dili rekolla, hamutuk saka 680 lori ba Fatumean fahe ba komunidade maibé seidauk to’o tanba komunidade Fatumean rasik totál uma-kain hamutuk 980.

Responsavel Ekipa Servisu Covalima Vitória ho Domin-20 (EKSES) iha Postu Administrativu Fatumean, Fortunato Amaral. Imajen/Espesiál.

“Komunidade iha Postu Administrativu Fatumean iha Suku tolu Aldeia 12, entaun aldeia ualu mak simu ona foos no hela aldeia haat mak seidauk simu. Tanba uma-kain iha Postu Administrativu Fatumea ne’e hamutuk 980, entaun hela uma-kain 300 mak seidauk simu,” Fortunato Amaral informa ba Agência TATOLI liuhosi telefónika, kinta ne’e.

Nia dehan, atividade fahe foos ba komunidade sira ne’e ekipa EKSES hala’o servisu hamutuk ho autoridade lokál iha fatin refere tanba dadus komunidade nian sira mak hatene liu. 

“Maneira ita fahe foos ba komunidade mak, foos tula ba karreta halai tuir ba aldeia sira mak ita hatun foos saka ida-idak ba komunidade nia uma, mak sira-na’in mai foti rasik. Maibé, ita mantein nafatin kumpre portokolu hosi minsitériu saúde hodi halo distansiamentu,” nia haktuir.

Nia hateten, foos saka 1000 ne’ebé Governu fó apoiu daudaun ne’e sei rai hela iha armajen Ministériu Solidaridade Sosiál no Inkluzaun (MSSI) Covalima, seidauk lori ba Postu Administrativu Fatumean tanba tempu agora kondisauan udan no estrada mós grave.

“Ita haree ba bainhira udan laiha ona no estrda mós maran ona mak ita-nia Administradór Munisípiu sei kontaktu ba ekipa EKSES munisípiu nian, sira lori mai mak foin distribui tan foos ne’e ba komunidade,” nia dehan.

Entretantu, responsavel EKSES iha Fatumean ne’e lori ekipa EKSES nia-naran hato’o agradese ba Governu no timoroan hotu ne’ebé ho fuan boot apoiu ona ba komunidade Covalima liuliu Postu Administrativu Fatumean durante serka sanitária.

“Ami sente kontenti no agradese ba Governuu no maluk timoroan hotu ne’ebé ajuda ona komunidade Covalima liuliu Fatumean, tanba apoiu ne’ebé ami hetan to’o agora ami konsidera no sente katak sufisiente atu ajuda ba komunidade Fatumean tomak,” nia dehan.

Notisia Relevante: Burokrasia halo povu Fatumean seidauk bele simu foos

Foos saka 680 ba komunidade iha Fatumean la sufisiente

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here