Embaixadór Timor-Leste ba Cambodia, Hermenegildo Kupa Lopes hasoru malu ho Ministru Edukasaun Cambodia, Hang Chuon Naron. Imajen/Embaixada TL ba Cambodia

DILI, 11 marsu 2021 (TATOLI) – Timor-oan na’in-20 oras ne’e kontinua hela sira-nia estudu iha Cambodia.

Estudante Timor-oan hirak ne’e, kompostu hosi na’in-10 hanesan bolseiru hosi Governu Timor-Leste no na’in-10 seluk nu’udar bolseiru hosi ONG Cambodia nian ne’ebé serve iha Timor-Leste.

Notísia Relevante : Cambodia hakarak estabelese vou direta ho Timor-Leste

“Estudante hirak ne’e nia kondisaun agora di’ak hela, maski COVID-19 nia kazu hanesan mós ita Timor nian. Maibé ami nia servisu iha ne’e kontaktu nafatin ita-nia estudante Timor-oan sira atu kumpre nafatin regra ne’ebé mak Governu fó sai hodi prevene an hosi propagasaun peste letál ne’e,” Embaixadór Timor-Leste ba Cambodia, Hermenegildo Kupa Lopes informa ba Agência Tatoli via WhatsApp, kinta ne’e.

Daudaun ne’e Governu Cambodia mós sériu loos rezolve no halo prevensaun ba pandemia COVID-19 ne’ebé komesa sa’e maka’as uitoan iha Cambodia.

Estudante Timor-oan hirak ne’e maioria estuda iha Cambodia University no area ne’ebé estudante hirak ne’e foti balu iha turizmu, ekonomia no seluk tan.

“Iha Cambodia, universidade barak hakarak oferese bolsa estudu ba Timor-oan sira maibé la’ós ba lisensiatura, maibé sira hakarak oferese mós ba mestradu no doutoramentu,” Hermenegildo Kupa Lopes hateten.

Iha parte seluk nia relata bainhira nia prezensa iha Cambodia hala’o vizita ba fatin barak no hasoru malu ho lider Cambodia baraka sempre ko’alia ba nian katak sira laiha rezerva hodi apoiu 100% Timor-Leste nia adezaun ba ASEAN.

“Primeiru Ministru Cambodia nian fó orientasaun ba membru Governu hotu tun to’o nivel kraik atu fó apoiu maka’as ba Timor-Leste atu tama lalais iha ASEAN no tuir sira nia observasaun, Timor -Leste bele ona tama iha ASEAN,” Hermenegildo Kupa haktuir.

Jornalista   : Hortencio Sanchez

Editór            : Francisco Simões

HAKEREK NO HATÁN

Please enter your comment!
Please enter your name here