Sentru Saúde Laleia. Imajen/Espesiál

DILI, 11 marsu 2021 (TATOLI)—Sentru Saúde Laleia iha postu administrativu Laleia, munisípiu Manatuto, daudaun ne’e menus kombustível ba ambulánsia halo operasaun, tanba ne’e responsável sentru buka mekanizmu atu rezolve.

Xefe Sentru Saúde Laleia, José da Costa, hateten atu salva pasiente nia vida maka tenke debe kombustível iha postu abastesimentu sira hodi tau ba ambulánsia, nune’e bele ajuda bainhira halo transferénsia pasiente hosi Sentru Saúde ba munisípiu Manatuto ou ba Hospital Nacional Guido Valadares (HNGV).

“Karreta ambulánsia mina laiha, orsamentu ba postu saúde mós laiha, ne’ebé ami tenke obriga-an debe mina sira ne’ebé fa’an iha Laleia hodi tau iha ambulánsia halo operasaun. Ha’u deside debe de’it, litru 20 ho folin $20, tanba ami ninia difikuldade liu mak kombustível, situasaun ne’e ami sempre hasoru bebeik,” Xefe Sentru Saúde Laleia, informa ba Agência TATOLI, via telefónika, kinta ne’e.

Nia hatutan, bainhira kombustível laiha, kontaktu ba lojístika munisípiu Manatuto maibé resposta kombustível iha munisípiu mós laiha.

“Ami presiza mina hodi tula amostra teste swab hosi abitante Laleia ba Laboratóriu Nasionál no bainhira atu transfere pasiente ba Manatuto ou Dili karreta laiha mina, entaun ami tenke buka meiu. Ha’u iha kompromisu ho ema sira fa’an mina, ne’ebé sira komprende hodi fó debe,” nia haktuir.

Dalaruma responsável Sentru Saúde tenke hasai osan rasik hosi tau mina iha ambulánsia.

“Bainhira laiha, ha’u uza saláriu mak selu, durante ne’e ha’u halo hanesan ne’e hela de’it, kuandu la halo maka ameasa tebes ba pasiente sira nia vida. Dalaruma ha’u debe to’o $100, maibé kuandu iha osan ona sempre selu kedas,” nia konta tuir.

Postu Saúde Laleia iha karreta ambulánsia ida mak halo operasaun no daudaun ne’e kondisaun di’ak hela maibé menus kombustível.

Jornalista: Antónia Gusmão

Editora: Julia Chatarina  

HAKEREK NO HATÁN

Please enter your comment!
Please enter your name here