Pesoál saúde halo hela teste swab ba abitante ida iha Postu Saúde Laleia, munisípiu Manatuto, kinta (11/03). Imajen/pesoál saúde Laleia

DILI, 11 marsu 2021 (TATOLI)–Sentru Saúde postu administrativu Laleia, munisípiu Manatuto, halo teste swab ba abitante Laleia hosi munisípiu Dili, maski daudaun iha kapitál nasaun ne’e aplika hela serka sanitária hahú loron 09 to’o 15 marsu, ne’ebé la permite abitante hosi Dili sai ba munisípiu seluk, maibé permite movimentu ba kondisaun emerjénsia.

Xefe Sentru Saúde Laleia, José da Costa, hateten motivu halo teste swab atu evita propagasaun COVID-19 tama ba rejiaun ne’e.

“Loloos Laleia-oan iha Dili kuandu Governu aplika serka sanitária labele mai Laleia tanba daudaun ne’e pozitivu COVID-19 aumenta ba bebeik iha Dili, maibé laiha problema kuandu mai ona ami-nia ekipa halo teste swab ba sira nune’e bele hatete loloos,” Xefe Sentru Saúde informa ba Agência TATOLI, via telefónika, kinta ne’e.

Notísia relevante: SS-CIGC deteta-tan pozitivu 12 iha Dili, rua iha Covalima

Hafoin profisionál saúde sira halo teste swab, sei transporta amostra ba Laboratóriu Nasionál, Dili hodi analiza.

Xefe Sentru Saúde Laleia, José da Costa. Imajen/pesoál saúde Laleia

“Kuandu rezultadu pozitivu, ami fó hatene filafali no buka dalan atu lori ba tau iha izolamentu no rezultadu negativu mós informa hikas fali. Di’ak liu prevene antes do que akontese tiha mak hakfodak ne’e defísil ona,” nia akresenta.

Teste swab realiza iha loron kuarta (08/03) iha Sentru Saúde Laleia, aleinde foti amostra ne’e iha Laleia, ekipa saúde mós halo teste iha suku Kairui ba ema na’in-neen.

“Daudaun ne’e Laleia-oan sira ne’ebé fila hosi Dili bá Laleia mós nafatin hein profisionál saúde sira halo swab, maibé ekipa sei halo teste iha suku Kairui ba na’in-neen. Ekipa halo teste ba ema iha suku ne’e tanba ami simu informasaun hosi Xefe aldeia katak iha estudante hosi Dili ho kondisaun isin-manas, mear, no dada-iis ladi’ak iha kedas Dili mak bá Kairui, tanba ne’e maka ami deside ba hodi halo teste,” José haktuir.

Amostra sira ne’e sei tau hamutuk lori ba Manatuto rekolla hamutuk ho sentru saúde sira seluk mak lori hamutuk ba iha Laboratóriu Nasionál.

Tuir Sentru Saúde Laleia, daudaun ne’e fasilidade sira hanesan reajente sufisiente atu halo teste swab ba populasaun bainhira presiza.

Enkuantu, pesoál saúde iha Sentru Saúde Laleia inklui postu Saúde, kompostu hosi médiku jerál na’in-haat, parteira-tolu, infermeiru-lima, pesoál limpeza rua, voluntáriu na’in-lima no kontratadu na’in-lima.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here