Profesór sira iha ESG 5 de Maio Becora. Foto: https://esg5demaio.wordpress.com/

DILI, 11 marsu 2021 (TATOLI)—Xefe Bankada Partidu Demokrátiku (PD), Deputadu António da Conceição ‘Kalohan’ hateten profesór sira nu’udar autór ne’ebé influénsia kualidade ensinu iha eskola públika sira, tanba ne’e Ministériu Edukasaun, Juventude no Desportu (MEJD) presiza dezenvolve didi’ak liután jestór eskola públika sira.

Eis Ministru Edukasaun ne’e fundamenta, iha aspeitu neen (6) ne’ebé jestór eskola públika sira presiza konsidera no Governu presiza monitoriza mak promove jestaun demokrátika, artikula partisipasaun inan-aman iha eskola, garante inkluzaun iha eskola.

Nune’e mós kuida klima eskola nian ho disiplina, avalia no monitoriza rezultadu prosesu aprendizajen no akredita susesu eskolár ba alunu sira.

Membru Komisaun G ne’ebé trata asuntu edukasaun, juventude desportu no sidadania fó hanoin ba Governu, hakarak atu konstroi jerasaun nia futuru tenke hahú agora tanba edukasaun konstitui prioridade ida-ne’ebé mai hosi Governu hotu-hotu ba iha dezenvolvimentu nasionál.

Razaun fundamentál liu mak setór edukasaun sai baze ba sosiedade atu transforma ba jerasaun kualifikada iha futuru, maibé atu konstroi depende ba ne’ebé tenke hahú agora.

Nia dehan, iha inísiu tinan letivu tenke hanoin kona-ba infraestrutura, merenda eskolár, oinsá partisipasaun labarik sira ba eskola no kondisaun adekuada ba profesór sira.

“Profesór nu’udar autór prinsipál ne’ebé mak bele influénsia kualidade ensinu no intermu inteletualidade alunu sira-nian. Ha’u dehan profesór nu’udar autór prinsipál tanba nia hanorin, nia presiza materiál hirak ne’ebé mak nia utiliza hodi hanorin hanesan livru, materiál sira-ne’ebé mak atubele orienta hodi hala’o nia kna’ar,” Sekretáriu Jerál Partidu Demokrátiku ne’e informa ba Agência TATOLI, iha Dili, kinta ne’e.

Nia argumenta, profesór nu’udar autór prinsipál tanba profesór tenke domina iha disiplina ne’ebé hanorin ba alunu sira.

“Se nia la’ós hasai kursu hodi sai profesór Matemátika, ne’e oinsá mak nia bele hanorin labarik sira ho di’ak. Ha’u liga ba eskola tékniku vokasionál nian, se ita hakarak hadi’a kualidade, ita tenke ser tau mós profesór sira tuir disiplina ne’ebé mak iha,” nia akresenta.

Maibé, nia haktuir, problema ne’ebé Timor-Leste hasoru mak profesór sira maioria ne’e mai hosi tempu uluk, tanba momentu eskola sira presiza entaun rekruta profesór atu hanorin maibé la domíniu iha disiplina, entaun ne’e mós influénsia kualidade edukasaun.

“Buat seluk ne’ebé ha’u haree mak se apoiu sira-ne’ebé mak presiza nia hetan hanesan subsídiu ne’ebé mak dívia nia hetan depois bele garante nia konsentrasaun atu hala’o kna’ar. Se laiha, ne’e mós halo profesór bele halo atividade estra hodi buka rendimentu ba nia. Entaun ida-ne’e influénsia mós kualidade edukasaun ne’e rasik,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here