Voluntariu husi movimentu Tasi Mos baihira prepara disinfektante hodi rega Klinika Komoro,, kinta 11 Marsu 2021.Imajen Tatoli/Antonio Goncalves

DILI, 11 marsu 2021 (TATOLI)—Xefe Bankada Partidu Demokrátiku (PD), Deputadu António da Conceição ‘Kalohan’, enkoraja partidu polítiku sira kontribui kombate propagasaun surtu COVID-19 liuhosi sensibiliza informasaun atu komunidade hakmatek iha uma.

Nia dehan, surtu COVID-19 ne’e refere ba saúde públika ne’ebé interese Estadu nian atu halo medida prevensaun sira.

“Ha’u hanoin partidu polítiku ne’ebé de’it ninia polítika ne’e ba interese povu nia di’ak. Se konfinamentu ne’e obrigatóriu, ha’u halo apelu reprezenta partidu atu husu ema hotu-hotu tenke kontribui hodi kumpre impozisaun. Ha’u dehan impozisaun ne’e katak buat ne’ebé Governu obriga hela ita atu halo, obriga ita la’ós dehan presaun ba ita maibé di’ak ba populasaun tomak,” Xefe Bankada PD ne’e informa ba Agência TATOLI, iha Dili, kinta ne’e.

Nia afirma, situasaun atuál oras ne’e obriga partidu polítiku hotu-hotu atu kontribui kombate lisuk inimigu invizivel ne’e.

Nia realsa, perspetiva PD ninian fó nafatin apelu hotu-hotu tenke ser submete ba konfinamentu obrigatóriu, ne’ebé sai nu’udar medida preventiva ida atu bele halo prevensaun hodi kontinua mitiga moras ne’e ninia nível transmisaun to’o ona iha-ne’ebé.

“Agora daudaun ne’e ita bele dehan nasaun ida halo prevensaun jerál iha territóriu nasionál. Ba ha’u, halo daudaun hanesan Dili ne’e embora iha nia implikasaun tanba Dili mak sentru ba atividade ekonómika hodi fasilita movimentu ba munisípiu sira. Nune’e mós hosi munisípiu halo movimentu tama mai kapitál Dili,” nia dehan.

Nia subliña, iha aplikasaun konfinamentu obrigatóriu konserteza fó impaktu ba atividade ekonómika iha kapitál Dili, maibé tenke ser hanoin atividade negósiu ne’e tanba hakarak konserva moris maibé saúde públika ne’e mós importante.

Nia husu ema hotu ne’ebé hela iha Kapitál Dili tenke submete ba regra konfinamentu obrigatóriu ne’e tanba situasaun surtu COVID-19 ne’ebé derrepente mosu.

“Loos duni iha família balu kbiit laiha duni. Ne’ebé, sira-nia moris depende ba atividade kada loron nian. Ida-ne’e sertamente iha impaktu ne’ebé maka boot, maibé ha’u hanoin atu husu Governu mós tenke haree ba komunidade sira-ne’ebé vulnerável, liuliu medida ida-ne’ebé ita hola iha loron hitu (7) nian ne’e tenke akompaña mós ho asisténsia umanitária ruma, liuhosi xefe suku no xefe aldeia sira,” Sekretáriu Jerál PD ne’e propoin.

Kalohan rekomenda ideia ne’e tanba komunidade iha Kapitál Dili barak mak fa’an modo no ai-maran hodi sosa fali hahaan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here