Prezidente Autoridade Munisípiu Baucau, Olivio “Bou Lesa” Freitas, halo juramentu iha serimónia tomada de pose ne’ebé akompaña hosi Pároku Manuel Ximenes, SDB. Imajen/Mídia MAE.

DILI, 11 marsu 2021 (TATOLI)—Prezidente Autoridade Munisípiu (PAM) Baucau, Olívio Freitas ‘Bou Lesa’, hateten liga ho kazu pozitivu COVID-19 ne’ebé deskobre iha Baucau no serka sanitaria iha Dili mak tékniku Administrasaun Munisípiu Baucau kontinua halo sensibilizasaun ba prevensaun ba komunidade iha merkadu Vila Nova Baucau, ohin.

“Orsida ita-nia tékniku Administrasaun Munisípiu sei halo sensibilizasaun ba prevensaun COVID-19 nian katak bainhira sai tenke uza máskara, fase liman ho sabaun, distánsia sosiál no fíziku. Ida-ne’e ita halo ba dala rua ona, dahuluk ita sensibiliza iha dalan públiku sira no merkadu,” Olívio Freitas ‘Bou Lesa’ hateten ba Agência TATOLI liuhosi telefónika, kinta ne’e.

Bou Lesa informa, situasaun jerál iha Sidade Baucau, komunidade hotu-hotu hakmatek no laiha movimentu ema no transporte públiku hanesan bus diresaun Baucau-Dili mós seidauk bele la’o.

“Liga ho pandemia COVID-19, ha’u husu ba komunidade iha suku 59 labele halo movimentu ba Dili. Bainhira atu sai halo atividade ruma tenke la’o tuir regra Ministériu Saúde (MS) ho Organizasaun Mundiál Saúde (OMS) katak tenke fase liman ho sabaun, uza máskara, distánsia sosiál no fíziku,” nia apela.

Nia dehan, bainhira iha kazu urjente ruma eh presiza nesesidade bázika, sira halo karta pedidu relata ba Prezidente Autoridade Munisípiu mak PAM halo deklarasaun akompañamentu ba sira hafoin sira halo viajen maibé liu ka la liu ne’e depende pesoál saúde ne’ebé iha dalan ne’e fó sira liu ka lae.

“Tanba lei la autoriza ema ka transporte halo movimentu hosi munisípiu ida ba nasionál, karik presiza urjente ruma mak komunidade bele halo karta pedidu ba PAM mak halo karta deklarasaun akompañamentu ba komunidae,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here