Movimentu Tasi Moos halo dizinfeta Igreja Maria Auxiliadora, Comoro, Dili, kinta 11 marsu 2021.Imajen Tatoli/Antonio Goncalves

DILI, 11 marsu 2021 (TATOLI)- Movimentu Tasi Moos (MTM) “Mama Bolu”, kinta ne’e, kontinua hikas nia atividade sosiál hodi  dezinfeta fatin públiku ne’ebé risku ba propagasaun COVID-19.

MTM dezinfeta Sentru Saúde Comoro, Dili, kinta 11 marsu 2021.Imajen Tatoli/Antonio Goncalves

Bainhira Timor-Leste identifika primeiru kazu COVID-19, iha tinan kotuk, no Governu deside primeira Estadu Emerjénsia iha territóriu nasionál, MTM hamutuk ho autoridade seguransa sira halo dezinfeta ona ba fatin públiku sira iha Dili-laran.

Notísia Relevante : PNTL ho MTM sei dezinfeta fatin risku COVID-19

Ba situasaun serka sanitaria iha kapitál Dili tanba pandemia COVID-19, juventude sira ne’ebé halibur malu iha grupu MTM “Mama Bolu” kontinua hikas sira-nia asaun sosiál ne’e no kinta ne’e, MTM  halo dezinfeta ba fatin sira hanesan iha Sentru Saúde Comoro, Igreja Maria Auxiliadora, Comoro, ho Ospitál Nasionál Guido Valadares (HNGV).

Koordenadór  MTM-MB, Gally Soares Araújo, hateten asaun ne’ebé sira hala’o dezinfeta  ba fatin sira ne’e tanba konsidera hanesan risku ás ba COVID-19 ne’ebé iha sirkulasaun ema nian barak tama sai iha fatin hirak ne’e.

MTM dezinfeta Sentru Saúde Comoro, Dili, kinta 11 marsu 2021.Imajen Tatoli/Antonio Goncalves

Gally Soares Araújo, ba Agência Tatoli liuhosi mensajen Facebook esplika objetivu hosi atividade ne’ebé  MTM hala’o oinsá atu bele halo prevensaun ba propagasaun peste letál COVID-19 ne’ebé daudaun iha ona transmisaun lokál iha Kapitál Dili.

Notísia Relevante : MTM Rega Ai-Moruk Dezinfeta Hodi Prevene Propagasaun COVID-19

“Ami iha membru 30-resin ho voluntáriu atu bele halo dezinfeta iha fatin sira ne’ebé risku ba COVID-19,” Gally Soares hateten.

Kona-ba materiál ba dezinfeta, nia dehan, sei sufisiente no sei presiza aumenta. maibé sira-nia parte tenta nafatin halibur apoiu hodi bele kontinua asaun dezinfeta  to’o bainhira Dili livre ona hosi COVID-19.

Atividade ne’e hetan apoiu másimu hosi Komandu Polísia Nasionál Timor-Leste (PNTL) Munisípiu Dili hodi bele asegura asaun ne’e ho seguru iha fatin risku.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here