Xefe Sentru Saúde Postu Administrativu Hatulia A, Munisípiu Ermera, José Martins. Imajen/Espesiál.

DILI, 11 marsu 2021 (TATOLI)—Xefe Sentru Saúde Postu Administrativu Hatulia A, Munisípiu Ermera, José Martins, hateten fulan fevereiru tinan ne’e Sentru Saúde Hatulia A rejistu moras númeru aas mak infesaun vias respiratóriu aguda.

“Durante fulan fevereiru 2021, ita rejistu moras aas liu iha Sentru Saúde Hatulia mak hanesan infesaun vias respiratóriu aguda na’in-520, isin katar na’in-460, pozitivu TBC na’in-12, diarea na’in-21,” Xefe Sentru Saúde Postu Adminitrativu Hatulia A, José Martins, informa ba Agência TATOLI liuhosi telefónika, kinta ne’e.

Nia afirma, kauza hosi moras infesaun vias respiratóriu ne’e mak hosi ahi-su’ar tanba komunidade barak mak tein uza ai-sunu, fuma sigaru, no ida mak ema hela uma ho sementu-rai entaun bainhira dasa rai ne’e rai-uut nia su’ar barak entaun bele afeta no ida seluk mak fatór ijiene pesoál.

“Hanesan ita-nia komunidade barak mak bainhira konsumu hahan la fase liman entaun bele afeta mós ba moras infesaun vias respiratóriu no mós ba moras sira seluk mós,” nia dehan.

Nia hateten, ema ne’ebé afeta ba moras infeasaun vias respiratóriu aguda ne’e hahú hosi labarik bebé idade zero to’o idozu sira.

“Agora daudaun ne’e, ita rejistu ne’e dominante liu mak idade 15 ba leten. Maibé, pasiente sira-ne’e ita halo atendimentu ne’ebé di’ak entaun sira-nia kondisaun rekoperadu hotu ona,” nia hateten.

Atu halokon moras ne’ebé daudaun ne’e rejista makaas iha sentru Hatulia A, nia dehan, polítika alternativu ne’ebé sira halo atu prevene moras sira-ne’e mak sira halo sensibilizasaun no promoasaun saúde ba eskola sira no komunidade.

“Ita rekomenda ba sira katak hotu-hotu tenke fase liman ho sabaun, tanba ida-ne’e kultura moos nian no ita mós mensiona nutrisaun di’ak ba labarik kiiik oan sira,” nia subliña.

Entretantu Sentru saúde Hatulia rasik desde Estadu Emerjénsia (EE) dahuluk to’o mai agora halo nafatin teste swab ba komunidade liuhosi triajén.

“Kriitéria ida mak tenke liuhosi triajén, nune’e ita bele halo teste swab no provizóriu hosi rezultadu teste swab ne’e to’o agora ita seidauk deteta ema ruma pozitivu ba COVID-19,” nia dehan.

Iha Munisípiu Ermera, antes Governu sentrál fahe Postu Administrativu Hatulia ba Postu Administrativu Hatulia A no Postu Administrativu Hatulia B, Postu Administrativu Hatulia nia área administrasaun mak kompostu hosi suku 13 no suku sira-ne’e mak Suku Aculau, Ailelo, Coilate-Letelo, Fatubessi, Fatubolo, Hatolia, Leimea-Craic, Lemia-Sarimbalo, Lisapat, Manusae, Mau-Ubo, Samara, no Suku Urahou.

Jornalista: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here