Kondisaun estrada ne'ebé reabilita hosi kompañia SAN José, nakfera iha área baliza entre Suku Tibar no Ulmera. Imajen TATOLI/Evaristo Soares Martins.

DILI, 11 marsu 2021 (TATOLI)Ministériu Obra Públika (MOP) liuhosi Diresaun Nasionál Estrada, Ponte no kontrolu Cheia koopera ho Unidade Jestaun Projetu (PMU, sigla ingles) sei halo investigasaun ba kondisaun estrada dirasaun Dili-Liquiçá ne’ebé hahú nakfera iha área baliza entre suku Tibar no Ulmera, postu administrativu Bazartete, munisípiu Liquiçá.

Diretór Nasionál Estrada, Ponte no Kontrolu Cheia, João Mário Gama de Sousa, hateten hafoin serka sanitária iha munisípiu Dili termina, ekipa hosi MOP-PMU sei halo investigasaun liuhosi foti amostra ba teste iha laboratóriu hodi justifika kualidade obra ne’e.

“Ita-nia obra ne’e halo hosi kompañia SAN José S.A hosi España, ne’ebe ami sei halo investigasaun hodi define liuhosi teste laboratóriu atu haree estrada nakfera ne’e tanba saida,” Diretór Nasionál ne’e informa ba Agência TATOLI liuhosi, via telefónika, kinta ne’e.

Notísia relevante: Estrada Dili-Liquiçá hahú ‘nakfera’

Lansamentu fatuk dahuluk reabilitasaun estrada dirasaun Dili-Liquiçá, hahú iha loron 11 jullu 2013, ho distánsia kilómetru 28,62, ho totál orsamentu millaun $20-resin ho ezekusaun durante tinan 4 (fulan 47).

Diretór Nasionál dehan, presiza halo investigasaun ba estrada ne’e, liuliu haree ba agregate crushing value tanba asphaltbele book-an tanba iha tempu implementasaun ladún halo konstatasaun di’ak, kondisaun seluk asphalt mahar ou falta kontrolu iha momentu implementasaun no haree kualidade asphalt mak ladún di’ak.

“Bainhira ita halo teste identifika estrada la tuir estadarte duni, ita husu resposabilidade ba kompañia atu hatan, maibé ita tenke tun ba terrenu no haree estrada nakfera tanba saida,” nia akresenta.

Aleinde ne’e, tuir Diretór, kompañia nia tempu retensaun hotu ona, no entrega ona ba Governu atu tau matan.

“Ha’u hakarak informa katak pagamentu halo hotu ona, tanba ita tun ba halo inspesaun no bór asphalt hodi halo teste iha laborátoriu no ita haree katak iha kualidade di’ak, maibé agora estragu iha parte balun hanesan ne’e tenke haree fali,” nia hatutan.

Tuir Dirijente ne’e, parte MOP nasionál halo ona kontaktu ho ekipa iha munisípiu Liquiçá atu haree tanba agora seidauk bele halo movimentu.

“Ita-nia ekipa iha Liquiçá, maibé ami labele halo movimentu tanba ita iha situasaun serka sanitária ne’ebé hotu mak ami book-an,” nia tenik.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here