Mapa munisípiu Viqueque. Imajen/Espesiál

DILI, 11 marsu 2021 (TATOLI)–Segundu Komadante Polísia munisípiu Viqueque, Superientidente Asistente, Inâcio Amaral, rejeita informasaun ne’ebé lansa hosi rede sosiál, kona-ba hahú rejista transmisaun lokál COVID-19 iha postu administrativu Uatulari, munísipiu Viqueque.

“Informasaun ne’ebé daudaun la’o iha rede sosiál  ne’e hoax, ida-ne’e informasaun ne’ebé seidauk serteza. Ami haruka ona intelejénsia buka tuir informasaun ne’e loos ka lae?, tanba espalla de’it iha facebook,”  Adjuntu Komadante Polísia Viqueque informa ba Agência TATOLI, via telefónika, kinta ne’e.

Notísia relevante: COVID-19: pozitivu lima hosi Covalima, ida hosi Baucau

Tuir nia, Komandu munisípiu kontinua serbisu hamutuk ho ekipa Ministeriu Saúde atu rekolla informasaun, nune’e labele fó paniku ba komunidade iha Viqueque.

“Komunidade munisípiu Viqueque laran, kompostu husu postu lima hanesan Viqueque Villa, Lacluta, Ossu, Uatulari no Uatucarbau, labele pániku no mantein kalma, labele fiar boatu ne’ebé espalla iha rede sosiál,” nia akresenta.

Nia apela ba abitante iha munisípiu ne’e, bainhira hasoru ema ruma tama sein iha informasaun klaru, bele fó hatene Polísia no autoridade lokál.

“Bainhira ema ruma hosi munisípiu afetadu tama mai, bele informa ba ekipa saúde hodi halo dizinfeta no lori ba fatin kuarentena hodi kumpre regra saúde,” nia hatutan.

Hahú kazu pozitivu COVID-19 mosu dahuluk iha Timor-Leste iha marsu 2020 to’o agora, munisípiu ne’ebé infetadu ona, Dili 127, Covalima 19, Bobonaro neen, Oé-cusse haat, Liquiçá rua no Baucau ida.

Kazu pozitivu ohin loron hamutuk 14, nune’e kazu ativu ne’ebé baixa ona iha sala izolametu hamutuk 65.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here