Uniaun Europeia (UE) liuhosi Organizasaun Mundiál Saúde (OMS) iha Timor-Leste, disponibiliza ona osan hamutuk $150,000.00 ba Programa Ai-han Mundiál (PAM) . Imajen/Espesiál

DILI, 10 marsu 2021 (TATOLI) – Uniaun Europeia (UE) liuhosi  Organizasaun Mundiál Saúde (OMS) iha Timor-Leste, disponibiliza ona osan hamutuk $150,000.00 ba Programa Ai-han Mundiál (PAM) atu bele kontinua hala’o vou umanitária ba pasajeiru no kargu sira entre Dili no Kuala Lumpur, Malázia.

“Ha’u haksolok tebes tanba OMS deside ona atu uza fundu balun hosi Ekipa Europeia hodi apoia servisu aviasaun PAM nian. Nune’e, sei garante katak, viajen umanitária ne’ebé liga Dili ba Kuala Lumpur, bele kontinua nafatin, hodi lori tulun médiku no transporte pasajeiru sira. Ligasaun aérea ne’e importante tebes iha momentu ida ne’e, tanba kazu COVID-19 iha Timor-Leste aumenta,” Embaixadór UE mai Timor-Leste, Andrew Jacobs, hateten liuhosi komunikadu imprensa ne’ebé Agência Tatoli asesu, kuarta ne’e.

Antes ne’e, Timor-Leste taka nia fronteira iha pandemia COVID-19 ne’ebé hada’et iha mundu tomak, inklui impozisaun ba proibisaun ba fronteira aéreu no seluk tan iha marsu 2020.

“Dezde tempu ne’ebá, vou komersiál  hotu-hotu  suspendidu hodi proteje nasaun  hosi  COVID-19. Durante nee, PAM nia servisu aviasaun sai hanesan vou importante ida ba fornesimentu ekipamentu médiku esensiál sira hodi hatán ba COVID19, no fornese transporte aéreu krítiku, inklui mós peritu sira ne’ebé serbisu atu apoia esforsu Governu Timor-Leste nian hodi satan virus ne’e,” nia dehan.

Hosi juñu 2020, aviaun PAM nian  hala’o ona operasaun hamutuk dala-19, tula pasajeiru hamutuk 1.354  no  ekipamentu médiku  tonelada 14.5 ho abastesimentu esensiál sira ba Timor-Leste. Organizasaun 83, inklui Governu Timor-Leste no korpu diplomátiku nasaun nian, sai ona benefisia  hosi servisu aviasaun ne’e.

Reprezentante OMS iha Timor-Leste konfesa katak, apoiu fundu hamutuk $150,000,00 ne’ebé extende ba PAM hodi mantein servisu aviasaun refere, foti hosi fundu millaun $2,4 ne’ebé fornese ba OMS iha Timor-Leste hosi UE atu apoia responde ba COVID-19 no haforsa sistema saúde iha nasaun ne’e.

“Servisu aviasaun PAM nian sai importante tebes iha nasaun ne’e, nia atuasaun jerál ba COVID-19 dezde inísiu. Hanesan mós ho sira seluk, OMS hetan ona benefísiu hosi servisu aviasaun refere;  fó dalan ba ita atu lori sasán médiku no ema sira ne’ebé importante tebes ba atuasaun COVID-19 nian. Ami kontente katak, ho apoiu hosi UE, ami bele hanaruk tan apoiu finanseiru hodi suporta PAM,” reprezentante Organizasaun Mundiál Saúde Arvind Mathur hateten.

Reprezentante WFP iha Timor-Leste, Dageng Liu mós relata, fundu UE-OMS ne’e ajuda PAM atu asegura kontinuidade  no posibilidade serbisu aviasaun entre Dili-Kuala Lumpur to’o agostu 2021.

“Obrigada ba kontribuisaun ne’e, PAM bele kontinua halo serbisu aéreu ida-ne’e hodi apoia povu Timor-Leste,” Dageng Liu hateten.

Jornalista   : Hortencio Sanchez

Editór        : Francisco Simões

 

 

HAKEREK NO HATÁN

Please enter your comment!
Please enter your name here