DILI, 10 marsu 2021 (TATOLI)–Koordenadór Forsa-Terefa ba Prevensaun no Mitigasaun Surtu COVID-19, Rui Maria de Araújo, hateten, pesoál ne’ebé mak tuda profisionál saúde sira bainhira hala’o hela serbisu sei la hamate espíritu serbisu profisionál sira.
“Atu hateten ba públiku katak, ita-boot sira-nia komportamentu sei la halo tauk ema saúde, tanba ema saúde ninia misaun atu halo duni serbisu ne’e. Imi bele tuda, maibé imi sei la tuda mate ka tuda kanek ami-nia espíritu atu serbisu,” Koordenadór Forsa-Terefa deklara liuhosi konferénsia imprensa iha Sentru Konvensaun Dili (CCD, sigla portugés), kuarta ne’e.
Notísia relevante: COVID-19, ema tuda ekipa saúde bainhira foti amostra swab
Nia dehan, bainhira ekipa saúde atu ba tula pasiente pozitivu sempre akompaña hosi Polísia, maibé realidade populasaun balun la kontente ho serbisu profisionál saúde hodi ikus mai tuda ekipa sira.
“Koordenasaun la’o hela, ekipa saúde ne’ebé halo serbisu iha terrenu buka tuir ema ne’ebé kontaktu besik, bainhira ema ruma pozitivu entaun ba foti pasiente pozitivu ne’e no sempre akompaña hosi seguransa, maibé ita-nia ema sira-nia laran mak hanesan ne’e, laiha buat ida,” nia akresenta.
Entretantu, iha tersa (09/03) kalan, bainhira ekipa saúde sira atu ba foti amostra teste swab COVID-19 hosi abitante sira iha área Caicoli, Dili, hetan tuda hosi ema deskoñesidu.
Jornalista: Antónia Gusmão
Editora: Julia Chatarina
ida tuda nee kaer nia ba karantina hamutuk sira positivu covid nee
forsa nafatin pessoal saude Sira, obrigado ba imi nia esforsu tomak hodi kombate virus ida ne iha Rai Timor-Lorosa’e. Hamutuk ita kombate virus corona husi ita rai doben Timor-Leste.