Diretór Operasaun AIFAESA, Gabriel da Costa. Imajen TATOLI/Egas Cristóvão

DILI, 10 marsu 2021 (TATOLI)—Diretór Operasaun Autoridade Inspesaun Fiskalizasaun  Atividade Sanitária no Alimentár (AIFAESA), Gabriel da Costa, informa stock foos hosi setór privadu bele atende nesesidade komunidade iha situasaun surtu COVID-19.

“Ekipa AIFAESA horiseik ba observa direita fatin distributór foos sira iha kapitál Dili, ne’ebé durante ne’e importa foos hanesan Perisos,  Lisun,  Kreatif no  Alfa Dili. Kompañia Perisos agora stock foos hotu iha armazen, maibé ohin loron sira-nia foos  tama ona tonelada 6.800 no agora iha Portu Dili,” Diretór Operasaun AIFAESA, informa ba Agência TATOLI, via telefónika, kuarta ne’e.

Notísia relevante: AIFAESA observa folin foos iha merkadu normál

Aleinde ne’e, parte kompañia Lisun rezerva kontentór 30 ba programa Cesta Bázika.

”Maibé hosi parte Lisun rasik, halo ona planu atu hatama foos tonelada 5000 iha fulan marsu ka abríl nia laran,” nia akresenta.

Enkuantu, kompañia Kreatif iha armazen foos hahú mamuk, maibé marsu nia laran planeia hodi hatama tonelada 10.000.

Nune’e mós, distributór Alfa Dili mós stock hotu, maibe sira iha marsu nia laran foos sei to’o iha Dili.

“Husu setór privadu kontinua apoiu ita-nia rai no  povu  iha situasaun saida de’it, tanba ne’e foos kontinua mantein iha territóriu Timór tomak,” nia akresenta.

Jornalista: Natalino Costa

Editora: Julia Chatarina  

HAKEREK NO HATÁN

Please enter your comment!
Please enter your name here