Mapa Munisípiu Ermera. Imajen/Google

GLENO, 10 marsu 2021 (TATOLI) – Vise-Diretór Sentru Saúde Postu Administrativu Railaco, Munisípiu Ermera, Duarte Soares hateten, daudaun ne’e sira nia parte lori ona estudante na’in-rua (2) hosi Eskola Tékniku Vokasionál (TEKVOK) Railaco ba Sentru Saúde Gleno atu haruka ba Dili tanba deskonfia pasiente na’in-rua  ne’e ida kontaktu direita ho pasiente pozitivu COVID-19 iha bairru BTN-II, Tasi-Tolu, Dili.

“Estudante na’in rua agora ami lori ba Gleno hodi hein sira Sentru Integradu Jestaun Krize mai foti lori ba Dili. Ami kaer  sira tanba sira na’in-rua ne’e ida kontaktu direita ho família ne’ebé pozitivu COVID-19 iha BTN-II, Tasi-Tolu tanba nia foin mai hosi Dili loron rua ba kotuk,” Duarte  Soares hateten ba Agência Tatoli via telefone, kuarta ne’e.

Nia konta kronolojia hosi estudante na’in-rua, mane hotu ne’e, ida nia rian rasik iha Tasi-Tolu pozitivu COVID-19 ne’e durante ne’e ba hela iha Dili. Nia mai kontaktu direita ho nia maluk estudante ida agora kaer hotu ne’e.

“Agora ami prepara ona sira hodi haruka ba Dili teste swab. Ita reza boot sira labele pozitivu ne’e Railaco ko’alia la di’ak agora sai preokupasaun boot loos mai ami,” nia hateten.

Daudaun ne’e situasaun iha Railaco la’o normal hela. Maibé ekipa saúde no família balu foin deteta hetan estudante rua ne’e hodi halo komunidade hotu iha area refere pániku.

Estudante rua ne’e, ida hosi Railaco no ida hosi Suku Leorema, Postu Administrativu Bazartete, Munisípiu Liquiça.

“Ami agora kontinua halo servisu nafatin fahe broxura sira ba komunidade hodi husu komunidade sira labele pániku,” nia hateten.

Jornalista   : Hortencio Sanchez

Editór        : Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here