Vice-Ministru Administrasaun Estatál, Lino de Jesus Torrezão. Imajen Tatoli/Antónia Maia Gusmão.

DILI, 10 marsu 2021 (TATOLI)–Vise-Ministru Administrasaun Estatál (MAE), Lino de Jesus Torrezão hateten, tersa (16 marsu 2021) semana oin, Governu liuhosi Ministériu Asdministrasaun Estatál (MAE) sei fó pose ba Administradór Munisípiu Covalima, Francisco de Andrade.

“Ami planeia ona parese tersa semana oin, ita fó posse ona ba ita-nia Administradór Munisípiu Covalima nian, atu nune’e nia bele hala’o nia knaar no funsaun nu’udar Administradór iha munisípiu,”  Lino de Jesus Torrezão hateten ba Agência TATOLI liuhosi telefónika, kuarta ne’e.

Governante ne’e hatutan, serimonia toma posse ne’e realiza iha nasionál de’it tanba situasaun pandemia COVID-19, nune’e labele akumula ema barak iha serimónia pose ne’e.

Lino Torrezão hateten, tanba Administradór Munisípiu Covalima mós iha hela nasionál tanba momentu nia tuir formasaun ramata, Covalima lockdown, nune’e tersa semana oin Governu fó posse hodi finaliza tiha. Depois hein ekipa tékniku interministerál halo apresiasaun ba Administradór Munisípiu Dili, Bobonaro, Ermera, Liquiça no Manatuto.

“Depois mak ita hein de’it Adminiatradór hosi munisípiu lima seluk tanba na’in lima tenke halo prosesu liuhosi tékniku interministerál ba apresiasaun. Apresiasaun hotu ita tenke ba iha konsellu konsultivu iha munisipál maibé ita labele halo tanba lockdown hela,” Lino haktuir.

Nune’e, nia hateten, sei kleur uitoan bainhira situasaun pandemia COVID-19 laiha ona mak bele halo Konsellu Konsultivu iha munisipál sira.

Jornalista: Osória Marques

Editór : Cancio Ximenes

HAKEREK NO HATÁN

Please enter your comment!
Please enter your name here