Administradór Munisípiu Lautém, Domingos Sávio. Imajen/Espesiál.

DILI, 10 marsu 2021 (TATOLI)—Administradór Munisípiu Lautém, Domingos Sávio hateten, liga ho situasaun serka sanitária no konfinamentu obrigatóriu iha kapitál Dili, daudaun ne’e Munisípiu Lautém mós foti medida hapara provizóriu movimentu transporte públiku ne’ebé halai kalan.

“Kona-ba situasaun iha Munisípu Lautém nian, iha ne’e Administradór Lautém hamutuk ho Polísia, ekipa saúde no dirasaun sira seluk, ami halo reuñiaun ida hodi deside hapara provizóriu movimentasaun transporte públiku ne’ebé halai iha tempu kalan. Objetivu atu, fasil deteta ema foun ruma ne’ebé tama Lautém,” Administradór Munisípiu Lautém, Domingos Sávio, hateten ba Agência TATOLI liuhosi telefónika, kuarta ne’e.

Nia dehan, sira deside hapara movimetu transporte kalan ninian tanba membru polísia ne’ebé destaka iha fronteira entre Lautém ho Baucau nian ne’e menus.

“Maske daudaun ne’e ita laiha fasilidade ne’ebé ajuda ita atu deteta ema tama sai ilegál maibé ami esforsu nafatin halo buat ne’ebé mak ami bele halo,” nia dehan.

Tanba, tuir nian, Lautém rasik iha ligasasun munisípiu rua ho dalan tolu ne’ebé fasil  ema bele tama no sai. Fatin sira ne’e mak hanesan, baliza Baucau ho Lautém, parte Postu Administrativu Iliomar nian ba Uatucarbau Viqueque, no Iliomar hosi Suku Tirilolo ba Baguia.

“Tanba ne’e ami husu ba nasionál atu apoiu rekursu umanu liuliu seguransa no saúde nian nune’e ami bele destaka membru polísia no pesoál saúde sira ba iha fatin sira-ne’ebé fasil ema halo movimentu ne’e,” Administradór Munisípiu Lautém Domingos Sávio hateten.

Reprezentante Governu Sentrál iha Munisípiu ne’e dehan, atividade hapara movimentu transporte ne’ebé halai kalan, ida ne’e provizóriu de’it. Nia dehan, bainhira serka sanitária ne’e ramata ita mós avizu fali ba komunidade atu movimentu ema no transporte bele la’o normal fali,” nia dehan.

Nia argumenta, kona-ba movimentu atividade komunidade Lautém nian, daudaun ne’e la’o normál no sira kumpre nafatin regra hosi protokolu Saúde nian, maske loron hira liubá deskonfia pesoál ida hosi Sekretária Estadu Formasaun Profesionál (SEFOPE) ne’ebé destaka iha Administrasaun Lautém pozitivu hotu, tanba viajen ba Dili kontaktu fíziku ba maluk balun ne’ebé agora pozitivu iha Dili.

“Ita deskofia katak funsionáriu pesoál SEFOPE nian ne’ebé destaka iha Administrasaun Lautém ne’e pozitivu hotu, tanba antes ne’e nia ba Dili kontaktu fíziku ho kolega sira iha SEFOPE, ne’ebé deteta ona pozitivu ba COVID-19. Entaun, agora halo ona teste suwab ba nia ne’ebé ita hein katak Maromak tulun rezultadu bele negativu no agora ami haruka nia auto-kuarentena hela iha uma,” nia informa.

Jornalisa: Arminda Fonseca

Editór: Cancio Ximenes

HAKEREK NO HATÁN

Please enter your comment!
Please enter your name here